Accessibility links

Кайнар хәбәр
21:43 18.5.2022

Марат Хөснуллин: Запорожье АЭС электр энергиясен Украинага сатачакбыз

Украинаның Мәскәү оккупацияләгән өлешендәге Запорожье атом электр станциясе, әгәр анда җитештерелгән электр энергиясен Украина алмаса һәм аның өчен акча түләмәсә, Русия өчен эшләячәк. Мәскәү басып алган Мелитопол шәһәренә килгән Русия премер-министры урынбасары Марат Хөснуллин Европадагы иң зур атом электр станциясе турында шундый белдерү ясады.

"Электр энергиясен кайдадыр саклап булмый. Шуңа күрә, әгәр Украина энергия системы аны кабул итсә һәм аның өчен түләсә, эшләячәкбез, кабул итмәсә — Русиягә эшләячәк", диде Хөснуллин. Аның әйтүенчә, "электр энергиясен кая сату" мәсәләсе Русияне "борчымый". Ул шулай ук станциядә хезмәткәрләренә анда эшләүне дәвам итү мөмкинлеге биреләчәген әйтте.

Хөснуллин басып алынган җирләрдә пенсияләр рубльдә түләнәчәген дә әйтте.

19:35 18.5.2022

19:19 18.5.2022

Төркия Финляндия белән Швециянең НАТОга кушылуы турында сөйләшүләргә киртә куйган

Төркия Финляндия белән Швециянең НАТОга кушылуы турында сөйләшүләр башлауга киртә куйган. Бу турыда Германиянең DPA агентылыгы чыганагы белдергән.

Financial Times язуынча, Әнкара Швециядән Төркиядә террорчылыкта гаепләнүче 30 кешене үзенә тапшыруны таләп итә.

Бүген НАТОда әлеге илләрне әгъза итеп алу турында сөйләшүләр башланырга тиеш иде, әмма НАТО әгъзасы таләбе аркасында башлый алмаганнар. Әнкара Швеция белән Финляндияне Төркиядә террорчы оешма дип танылган Көрд эшчеләр партиясен һәм көрд активистларын яклауда гаепли.

Моңарчы нейтраль булган Швеция белән Финляндия Русиянең Украинага һөҗүменнән соң НАТОга кушылырга карар итте.

17:26 18.5.2022

Русия саклану министрлыгы "Азовсталь"дән 959 украин хәрбие чыгуын хәбәр итте

Русия саклану министрлыгы Мариупольдәге "Азовсталь" заводыннан 959 украин хәрбие чыгарылуын белдерде, алар арасында 80е яралы.

Украин хәрбиләре Русиядән ярдәм алучы фетнәчеләр контролендәге җиргә чыгарылган. Саклану министрлыгы моны "әсирлеккә бирелү" дип атый.

Украина хакимиятләре Русия саклану министрлыгы хәбәренә фикер белдермәде. Шулай да алар хәрби җитәкчеләре фәрманы белән "Азовсталь"дән украин хәрбиләренең чыгуын раслады. Хәзерге вакытка заводта ничә украин хәрбие калуы билгеле түгел.

Тулырак монда укый аласыз.

16:36 18.5.2022

Кытай Русиягә технологияләр экспортын нык киметкән

Март аенда Русиягә Кытай технологияләрен китерү берничә мәртәбә кимегән. Бу Кытайның Русиягә АКШ тарафыннан кертелгән чикләүләрне бозудан куркуы белән бәйле булырга мөмкин. АКШ сәүдә министры Джина Раймондо шулай дип белдергән.

Февраль белән чагыштырганда, март аенда Кытайдан Русиягә смартфоннар китерү 67 процентка, ноутбуклар — 40, телекомуникация челтәрләре җиһазлары 98 процентка кимегән. Бу Кытай сәүдәсе турындагы соңгы мәгълүматлардан күренә дип белдерде Раймондо. Ул Кытайдан Русиягә экспорт кимүне "Пекинның АКШ сәүдә чикләүләренә сак каравы билгесе" дип бәяләде.

Тулырак монда укый аласыз.

15:12 18.5.2022

Канада Путинга, Лавровка һәм тагын меңгә якын кешегә илгә керүне тыйды

Канада Украинада барган сугыш аркасында санкцияләргә эләккән Русия, Беларус һәм Украина ватандашларына чикләүләрне киңәйтте. Алар арасында Русия президенты Владимир Путин, тышкы эшләр министры Сергей Лавров һәм саклану министры Сергей Шойгу да бар.

Хәзер түрәләр үзләре дә, аларның гаиләләре дә Канадага керә алмаячак. Бу хакта 17 майда илнең иҗтимагый иминлек министры Марко Мендичино белдерде.

Канаданың Чик буе хезмәтләре агентлыгы аңлатуынча, хөкүмәт иммиграция турындагы канунга төзәтмәләр кабул итәчәк. Бу үзгәрешләргә ярашлы, санкцияләр исемлегендәге затлар һәм аларның гаилә әгъзалары Канадага килә, бу ил визасын ала алмаячак, шулай ук илдән депортацияләнергә мөмкиннәр.

Канаданың чикләүләр исемлегендә меңгә якын кеше бар, аларның күпчелеге – Русия ватандашлары.

15:11 18.5.2022

WHO Мариупольдә (ваба) холера таралырга мөмкин дип кисәтә 

Дөнья сәламәтлек саклау оешмасы мәгълүматынча, Мариупольдә эчә торган сулар канализация сулары белән катнашкан, бу исә төрле инфекцион авырулар китереп чыгарырга мөмкин. Оешма холерага каршы вакциналар әзерли.

Бу хакта 17 майда Киевта узган матбугат очрашуында Дөнья сәламәтлек саклау оешмасының (WHO) гадәттән тыш хәлләр төбәк мөдире Дорит Ницан белдерде.

Ницон сүзләренчә, Мариупольдә су белән тәэмин итү "өлешчә торгызылган", әмма күпчелек суүткәргеч торбалар җимерек хәлдә.

"Мариупольдәге хөкүмәтнеке булмаган оешмалардан, анда урамнарда сазлык булуын, канализация суының эчә торган су белән кушылуы турында мәгълүмат алдык. Бу күпчелек инфекцияләр, шул исәптән холера таралуның зур куркынычын тудыра. Без 2011 елга кадәр Мариупольдә холера белән авыру очраклары булуын хәтерлибез һәм әзерләнәбез", диде ул.


14:55 18.5.2022

Уфада мәхкәмә активист Ләйсән Солтангәрәеваны сугышка каршы ялгыз пикетка чыккан өчен штрафка тарткан

25 апрельдә Солтангәрәева “Русиягә азатлык. Украинага тынычлык” дигән плакат белән Уфаның “Центральный” сәүдә үзәге янына чыккан булган, бу гамәле өчен аңа 35 мең сум штраф җәзасы биргәннәр.

Украинага каршы сугыш башлаганнан соң Русия хакимиятләре кануннарны кырыслатты. Русиядә сугышка каршы чараларда катнашучыларга каршы яңа – "урыс гаскәрләре турында ялган мәгълүмат тарату һәм аларны дискредитацияләү" маддәләре нигезендә административ һәм җинаять эшләре ачалар, шул исәптән социаль челтәрдә фикер белдерүчеләргә дә.

дәвам

фикерләр (33)

XS
SM
MD
LG