Сугыш башланганнан бирле 1,2 млннан артык Украина ватандашы үз йортларын ташлап китәргә мәҗбүр булган. Бу хакта БМО мәгълүматына сылтанып, Украинаның стратегик коммуникацияләр һәм мәгълүмати иминлек үзәге хәбәр итә.
650 меңләп кеше Польшага чыккан, калганнары Молдова, Словакия һәм Румыниягә киткән.
Сингапур Русиягә каршы чикләүләр кертте
Сингапур хакимиятләре Русиянең Украинага бәреп керүе сәбәпле Русиянең дүрт банкы - ВТБ, ВЭББ.РФ, Промсвязьбанк һәм "Россия" банклары белән килешүләр төзүне тыйды. Чикләүләр шулай ук Русия хөкүмәтенә, Русия Банкына һәм алар белән бәйле оешмалар файдасына акча җыюга китерүче хезмәтләр күрсәтүгә дә кагыла.
Моннан тыш, Сингапур Русиягә хәрби тауарлар, электроника һәм компьютер экспортлауны тыйды.
Шулай ук Samsung ширкәте дә Русиягә көнкүреш техникасы, телефоннар һәм чиплар сатуны туктатып тора.
Русия саклану министрлыгы хәбәр итүенчә, Мәскәү вакыты белән сәгать 10да тынычлык тәртибе игълан ителәчәк һәм Мариуполь һәм Волноваха шәһәрләреннән кешеләр чыга алсын өчен һуманитар коридор ачылачак. Һуманитар коридор һәм чыгу юллары Украина ягы белән килештерелгән диелә хәбәрдә.
Төн эчендә дигәндәй Русиядә бәйсез матбугат чаралары юкка чыкты. "Фейклар" турында канун кабул ителгәннән соң соңгы кичтә Bloomberg агентлыгы, Американың CBS һәм ABC телеканаллары, CBC Канада телерадиостанциясе Русиядә эшләми башлады.
Моңа кадәр "Эхо Москвы" туктады һәм хәтта социаль челтәрләрдән дә китте. “Новая газета” һәм The Bell сугышны "махсус операция" дип атаулары турында белдерде. BBC Русиядә эшчәнлеген туктатып тора.
Азатлык Радиосы сайтлары да томаланды, ләкин әлегә булдыра алганча эшчәнлегебезне дәвам итәбез.
4 март кичендә Прага, Франкфурт, Париж, Лион, Братислава, Вена, Тбилиси һәм Вильнюс шәһәрләрендә Украинага теләктәшлек белдерү чаралары узды.
We All Stand with Ukraine (Без барыбыз да Украина белән) дигән исем белән узган чараларның төп үзенчәлеге - Украина президенты Владимир Зеленский белән телекүпер булды. Киевтан видеотрансляция зур экраннарга чыгарылды.
Прагада чара Вацлав мәйданында узды. Украин халкына теләктәшлек белдерергә һәм аның лидерын тыңларга дистәләрчә мең кеше килде.
Башкортстан башлыгы Радий Хәбиров бүген Уфада узган хоккей уенында Z хәрефле плакат күтәреп Украинада барган сугышны яклавын күрсәтте.
Федерация шурасындагы Тува вәкиле Людмила Нарусова югары пулат утырышында Украинада һәлак булган Русия хәрбиләренең 96сы рекрутлар булуын белдерде. Нарусова әйтүенчә, аларны профессиональ хәрби хезмәт килешүе имзаларга мәҗбүр иткәннәр. Әлеге утырыш Федерация шурасының YouTube каналында күрсәтелде.
Элегрәк Русия хакимиятләре сугышта рекрутларның катнашмавын белдергән иде. Солдат аналары комитеты исә сугыш башланыр алдыннан рекрутларны килешү имзаларга мәҗбүр итеп Украинага җибәрүләрен белдерде.
Microsoft Русиядә яңа продуктлар сатуны һәм хезмәтләр күрсәтүне туктатып тора. Бу хакта аның президенты Брэд Смит белдерде. Бу Украинадагы сугыш белән бәйле диде ул.
Аның сүзләренчә, Microsoft АКШ, Европа берлеге һәм Британия хакимиятләре белән тыгыз элемтәдә эшли һәм шунлыктан әлеге дәүләтләр керткән чикләүләр сәбәпле Русиядә үз бизнесын туктатып тора.