Сугышка каршы халык иҗаты. Бу инсталляцияне бүген Екатеринбурда урнаштырганнар.
Сезгә дә мондый күренешләр очраса, безнең белән уртаклаша аласыз.
Косметика сатучы иң зур сәүдә челтәре булган Sephora Русиядә кибетләрен ябуын һәм онлайн-сәүдәне дә туктатуын белдерде.
DOXA телеграм-каналы сугышка каршы чыккан өч кызның Мәскәүнең "Братеево" эчке эшләр бүлегендә кыйналуы турында яза: кызларны кыйныйлар, битләренә су сибәләр, чәчләреннән тарталар, хәтта башларына пакет та кидерәләр. Кызлар өчен китерелгән кирәк-яракны кабул итмиләр, алар янына беркемне дә кертмиләр, диелә. "ОВД-Инфо" проекты кыйнауга дучар булган Александра Калужскихның шул турыда диктофон язмасын чыгарды. Монда тулырак.
Русия агрессиясенә каршы тору өчен Украинага Британиядән беренче ихтыярилар килә
Британиянең элекке хәрбиләре Украинада халыкара батальонда катнашырга җыена. Моның сәбәпләре төрле. Аларның берсе, мәсәлән, хатын-кызларны көчләүдән саклау өчен барам, ди. Украина тышкы эшләр министры Дмитрий Кулеба 4 мартта Русия солдатлары басып алынган территорияләрдә хатын-кызларны көчли, дип белдергән иде. Әмма Кулеба моны раслый торган фактлар китермәде. Reuters һәм башка халыкара медиа мондый очраклар булуын бәйсез чыганаклардан раслый алмады.
Азат Европа/Азатлык радиосының украин редакциясе видеосы.
Русия Украинада 211 мәктәпкә һөҗүм иткән
Сугыш башыннан бирле Русия хәрбиләре Украинада 211 мәктәпне юк иткән яки җимергән. Бу турыда Украина мәгариф министры Сергей Шкарлет телемарафонда белдерде.
“Бүгенгә 211 мәктәп дип әйтә алам. Аларның бер өлеше тулысынча юк ителгән, бер өлешенә зыян килгән”, диде Шкарлет.
Аның әйтүенчә, хәзер Украинада Русиянең тыныч халыкка карата җинаятьләре
теркәләчәк интерактив харита әзерләнә. Анда мәгариф инфраструктурасына һөҗүмнәр дә теркәлеп барачак.
Русиянең артиллерия һәм һава һөҗүмнәре бар Украина буйлап мәктәпләрне юк итә. Чернигов шәһәрендә һөҗүм вакытында мәктәптә булган бер укучы кыз: “Сездә хәлләр яхшырак дип өметләнәм… Бу видеоны барлык урыс дусларыгызга җибәрегез”, ди.
Украина министры киңәшчесе: “Якын көннәрдә дошман Киевны алырга тырышып караячак”
Украина эчке эшләр министры киңәшчесе Вадим Денисенко Украина телевидениесенә, Русия гаскәрләренең хәрәкәтләренә караганда, якын көннәрдә алар Киевны алырга тырышачак дип белдерде.
“Киев янында шактый күп санлы Русия хәрби техникасы һәм гаскәрләре туплана. Аңлавыбызча, Киев өчен сугыш алдагы көннәрнең төп бәрелеше булачак”, диде Денисенко.
Украинага каршы сугышның беренче көннәрендә Русия гаскәрләре Киевка үтеп керергә омтылып карады, әмма каты бәрелешләр нәтиҗәсендә шәһәр читендә үк туктатылды.
6 мартта Русия төбәкләрендә Украинага каршы сугышка ризасызлык чараларында кимендә 4 мең кеше тоткарланган дип хәбәр итә ОВД-Инфо. Русия эчке эшләр министрлыгы 3,5 мең кешенең тоткарлануын белдергән иде. Протест чаралары 56 шәһәрдә узган.