Мелитопольдәге кырымтатарлар: Оккупантлар Мәҗлес, Конгресс белән бәйле активистлар турында мәгълүмат җыя
Украинаның көньягында, Донбасска чиктәш Запорожье өлкәсенең Мелитополь шәһәрен март башында Русия гаскәрләре басып алганнан соң андагы халыкның тормышы нык үзгәрде. Кырым башкаласы Акмәчеттән (Симферополь) 270 чакрым ераклыкта урнашкан, 150 мең кешелек (2021 ел) Мелитопольдә 3 меңгә якын кырымтатар яши.
Кырымтатарлар Азатлыкка бүген ничек көн күрүләре турында сөйләде. Мәсәлән, Ридван Ибраимов сүзләреннән бер өзек:
— Шәһәрдә украин һривнясы әлегә йөри, ләкин "Приват" банкның баш офисы инде ябылды, кешеләр 10-15 процент өстәмә белән акчаларны аферистлардан алмаштырырга мәҗбүр, пенсияләр инде ике айдан бирле түләнми. Русия програмнары буенча мәктәпләрдә укытырга теләмәгән укытучыларны автобуслардан шәһәрнең читендә төшереп, өйләренә җәяү барырга мәҗбүр итә башладылар, оккупантларга ярдәм итүче коллабарантлар да бар.
Бүген Казанда Украиана сугышында һәлак булган 22 яшьлек Дамир Гыйлемханов җирләнде.
Аның белән хушлашырга Татарстан президенты Рөстәм Миңнеханов та килде дип хәбәр итә Татар-информ.
Дамир Гыйлемханов 1999 елда туган, Казанның 42нче мәктәбендә белем алган, көллият тәмамлаган. 2019 елда армиягә алынган, хәрби хезмәте тулгач, контракт төзегән. Үлеменнән соң аңа Русия каһарманы исеме бирелде.
Азатлык Украинада һәлак булучы Татарстан-Башкортстан хәрбиләренең исемлеген барлый.
БМОның качаклар эше агентлыгы хәбәр итүенчә, Русия Украинага сугыш башлаганнан соң, 50 көн эчендә Украинадан биш миллионлап кеше күчеп киткән.
14 апрельдә БМО югары комиссарының качаклар эше идарәсе чыгарган яңа статистикага күрә, сугыш аркасында 4 736 471 украин илдән китәргә мәҗбүр булган.
Cугыштан качучыларның 90 проценты – хатын-кызлар һәм балалар, чөнки гаскәргә чакырылу яшендә булган ирләргә Украинадан китү тыелган.
Якынча 2,69 миллионы Польшага киткән. Икенче урында – Румыния, ул үзенә 716,7 мең качакны кабул итте.
15 апрель иртәсенә төп хәбәрләр:
- Русия саклану министрлыгы "Москва" крейсеры батуын таныды. Министрлык ул давылда баткан ди, Украина исә аңа ракет белән һөҗүм иткәнен белдерә.
- Европа берлегенең яңа санкцияләр пакетында Русия нефте импортын тыю турында актив сөйләшүләр бара. NYT язуынча, ахыргы карар Франциядә президент сайлавының икенче турыннан соң кабул ителәчәк (24 апрель).
- БМО мәгълүматына күрә, көн саен Украинага 30 мең кеше кайта. Бүгенге көндә илгә инде 870 меңләп украин качагы кайткан.
- Джо Байден Украинага үзе килергә әзер булуын белдерде.
- Псковта Русия армисен дискредитацияләү гаебе белән танылган опозиция сәясәтчесе Лев Шлосберг тоткарланган. Соңрак аңа беркетмә төзелгән, сәясәтче өйгә кайта алган.
Русия саклану министрлыгы "Москва" крейсерының батуын таныды
Бер тапкыр кулланыла торган табак-савыт җитештерүче Huhtamaki ширкәте (Финляндия) Русиядә бизнесын туктата башлаган.
Аның заводлары Татарстанда (Алабуга ирекле икътисад зонасында), Мәскәү өлкәсендәге Ивантеевкада бар. Аларда барлыгы 700ләп кеше эшли. Соңгы елларда ширкәт экологик кәгазь савытлар җитештерүне үстерә иде, пластиктан баш тарткан иде.
Сугыш татар матбугатына ничек тәэсир итә?
Сугыш Русиядә газет-журнал чыгару эшенә дә яңа кыенлыклар өстәде. Типография чыгымнары арта, буялар бетә, интернеттан фотосурәтләр алу кыенлаша, нәшрият програмнары эшләми башларга мөмкин.
Баш мөхәррирләр әйтүенчә, матбугатка язылу бәясе декабрь аенда ук билгеләнә. Шул чакта алар каталогка кертелә һәм анда мәгълүмат чарасының хакы куела. Типография яки почта бу айда бәяләрне арттырды дип кенә ул хакны үзгәртеп уйнап булмый. Шуңа редакцияләр көтелмәгән чыгымнарга дучар булачак.
Азатлык Казандагы татар газетлары мөхәррирләре һәм типография җитәкчеләре белән сөйләште. Язманы монда укып була.
Русия тикшерү комитеты Украинаны Брянски өлкәсенә ут ачуда гаепләде
Комитет белдерүенә күрә, Украина хәрби көчләре ике боралакта Русия һава киңлегенә кергән һәм Брянски өлкәсенең Климово авылындагы торак йортларга кимендә 6 авиаһөҗүм ясаган.
Русия тикшерү комитеты җинаять эшен кузгатуы турында хәбәр итте.
Украина рәсмиләре әлегә бу хәбәрне шәрехләмәделәр. Элегрәк Украина бу көннәрдә Русиянең провокацияләр оештырырга мөмкин булуын белдергән иде.