San Antonio -- Amerikan prezidentı George Bush telefon söyläşülären tıñlaw programmasın qabat yaqlap çıqtı. Yäkşämbedä Texas ştatında, Ğiraqta yaralanğan xärbilär däwalanıp yatqan üzäktä çığış yasap, Bush qayber watandaşlarnıñ çit il telefon söyläşülären häm elektron xatların küzätü Amerikağa qarşı terror höcümnären kisätergä yärdäm itä dide. Anıñ süzlärençä, bu programma çiklängän külämdä alıp barıla, barı tik Äl-Qaidä belän bäyle dip sanalğan keşelärneñ Amerikağa şaltıratuları küzätelä. "Minemçä, amerikannarnıñ kübese doşmannıñ ni uylağanın belergä kiräklegen añlıy. Bez suğışta, kisätüsez höcüm itkän salqın-qanlı üterüçelär belän. Min qanun qısalarında xäräkät itergä tieş, häm minşulay eşlim dä," di Amerikan prezidentı. Telefon söyläşülären tıñlaw tärtibe 11 Sintäber höcümnärennän soñ kertelde. Qayber kongressmennar monı qanunsız dip sanıy, häm bu mäsälädä tıñlawlar oyıştırırğa cıyına.
