Accessibility links

Кайнар хәбәр

Zakir Şaxban icattaş dusları belän Omski yağında bulıp kitte


Şuşı könnärdä genä Omski ölkäsenä konsertlar belän Tatarstannıñ atqazanğan artistı Zakir Şahban citäkçelegendä ber törkem Tatarstan artistları kilep kitte. Çığışı belän Novosibirski ölkäseneñ Tarmakül' awılınnan bulğan Zakir, yıl sayın bulmasa da, yış qına Seber yaqlarına kilep, tatar xalqın cır-moñnarı belän söyenderep kitä. Tıñlawçılar xäterläsä, “Azatlıq” radiosı näq ber yıl elek Zaqir Şaxban citäklägän törkemneñ Omski, Novovsibirski, Tomski şähärlärendä buluları xaqında xäbär itkän ide. Bıyıl da Zaqir, Seber yaqlarına säfärlären däwam itte - Omskiğa kilde. Şunsı iğtibarğa layıq, xäzerge kilüendä bu törkem konsertlar belän Omskida ğına bulmadı, ä şähärdän 200-300 çaqrım yıraqlıqta bulğan Bol'şereç'ye häm Tara rayonnarına da barıp citte. Äytergä kiräk, xäzerge zamanda, awıl-rayonnarda yäşäwçelärneñ matdi xälläre artıq maqtanırlıq bulmağanda, mondıy yıraq säfärgä çığu artistlardan berniqädär batırçılıq ta taläp itkänder.

- Zakir, bötenläy diärlek kerem birmi torğan mondıy säfärgä niçek çığarğa buldığız?”

- Prezidentıbız Mintimer Şäymiev tarafınnan Tatarstanda 2006 yıl ädäbiät häm sänğät yılı dip iğlan itelde. Bezneñ burıçıbız, cirneñ tatarlar tuplanıp yäşägän barlıq töbäklärenä dä barıp citü, xalqıbızğa tatar mädäniäten citkerü.

Äye, Tatarstannan yıraq töbäklärdä yäşäwçe millättäşlärebezgä yuğarı däräcädäge tatar sänğäte belän tanışu mömkinlege kön dä bulıp tormıy. Ä bulğan oçraqta, oçraşular cirle xalıq öçen çın mäğnäsendä bäyrämgä äylänä. Çığışı belän Tatarstannan bulğan, 1950-nçe yıllarda institut tämamlağannan soñ yullama belän Tara şähärenä uqıtuçı bulıp kilgän häm biredä yäşäp qalğan Fäniä apa Fatxullinna “Şatlandırdı bezne Qazan artistları, zur räxmät alarğa”,-di. Başqalar da Tatarstan artistlarına tirän räxmätlären belderdelär, qabat kilülären soradılar.

Konserttan soñ artistlar Tara şähäreneñ tatar mädäniät üzäge aktivistları belän oçraştılar. Aralaşu ğädättägeçä çäy östäle artında bardı. Anda süz asılda tuğan telne saqlaw, tatar ğailäläre buldıru, balalarnı milli ruxta tärbiäläw turında bardı. Soñınnan süzdän cırğa, cırdan biügä küçelde.

Tara tatarlarınıñ soñğı waqıtta başqarğan eşläre belän biredä oyışqan tatar üzäge citäkçese Rauşaniä Kurmanova tanıştırdı.

- Bezgä yaña yıldan kitapxanä binasında ber bülmä birdelär. İke keşegä zur bulmasa da xezmät xaqı tüli başladılar. Bez xäzer binanı tözekländerü östendä eşlibez. Biredä “Nur” ansambleneñ repetitsiäläre ütä. Balalar da yöri. Alar belän cırlar – iyüllär öyränäbez. Küptän tügel genä “Näwrüz” bäyräme ütkärdek. Anda balalar da, ölkännär dä qatnaştı. Cäy köne Sabantuy ütkärergä niätlibez. Küräsez, eşlärebez bik küp .

Bol'şereç'ye rayon üzägendä dä Tatarstan artistların cılı qarşıladılar. Biredä ğädättä, cirle kollektivlar konsertlarına kilgän tamaşaçı sanı 30-40 keşedän artmıy. Bu yulı konsertqa kilüçelär sanı 200-dän artıp kitkän ide. Şunsı da iğtibarğa layıq, tamaşaçılar rayon üzägennän genä bulmadılar, ä 80 - 90 çaqrım yıraqlıqtağı tatar awıllarınnan da kilgän idelär. Konsert tämamlanğannan soñ biredä dä tatar aktivistları belän oçraşu buldı. Barsı da konserttan qänäğät buluları turında belderdelär.

Tatarstan artistlarınıñ soñğı konsertları Omskida Malunsevo isemendäge mädäniät sarayında uzdı. Şähär tamaşaçısı da konserttan qänäğät qaldı.

Östäp şunı da äytergä kiräk, soñğı yıllarda tatar konsertlarına yörüçelärneñ sanı kimi baruı küzätelä. Monı ber yaqtan ölkän yäştägelärneñ olığayıp, konsertlarğa yörmi başlawları belän añlatıp bulsa, ikençe yaqtan yäş buınnı üz mädäniätenä bitaraf buluı belän dä añlatıp buladır. Şulay da Omskida uzğan konsertlarda zalda yäşlär dä şaqtıy ide. Törkem administratorı Gölüsä xanım yäşlärdä tatar mädäniätenä ixtıäc bulsın öçen, alarnı keçkenädän ük milli ruxta tärbiälärgä kiräk ikänlegen qabat assızıqladı. “Näni çaqlarınnan balalarıbıznı tuğan telebezdä söyläşep tärbiäläsäk kenä, alar üzlären tatar dip xis itärlär. Millätebez betmäsen, saqlansın disäk, monı härber ata-ana belep torırğa tieş”,- dide ul.

Saniä Mirxaleeva, Omski

XS
SM
MD
LG