Şimbä könne Ufada, Rusiä Federal' iminlek xezmäteneñ Başqortstan idäräse häm Başqortstan prokuraturası urnaşqan bina qarşında piket ütäçäk. Bu xaqta Başqortstan Berläşkän oppozitsiäse koordinatsiä şurasında bu atna başında uq qarar itelgän ide. Älege piketnı ütkärüneñ berniçä säbäben atıy oppozitsiä wäkilläre.
Mäğlüm buluınça, Ufada Başqortstan Berläşkän oppozitsiäsenä kerüçe oyışmalar wäkilläre 27 aprel' könne Ufadağı Lenin isemendäge mäydanda zur ğına uram cıyını oyıştırırğa niätlägän ide. Ämma näq şul cıyın başlanırğa berniçä säğät qala ğına oppozitsiä citäkçelären qulğa aldılar häm başta alarnıñ eş urınnarında, annan soñ fatirlarında, yortlarında tentülär oyıştırdılar. Barlıq bu ğämällärne FSB, yäğni Başqortstan İminlek xezmäte wäkilläre başqardı. Tentülär tämamlanğaç isä oppozitsiä citäkçelären FSB binasına alıp barıp tön urtasına qädär soraw alular ütkärdelär.
Ä 29 aprel'gä qarşı töndä Ufada bäysez jurnalist häm irekle “Provinsial'nıye vesti” digän gäzitneñ baş möxärrire Viktor Şmakov qulğa alındı. Ul üze çığarğan gäzit bitlärendä Başqortstan xakimiätlären köç qullanıp citäkçelektän töşerergä çaqırğan yazmalar bastıruda ğäyeeplänä. Älegä qädär Viktor Şmakov tikşerü bülegendä utıra. Anıñ sälämätlege dä şäptän tügel dilär. Şuña kürä şimbä könne ütäçäk piketta anı azat itü taläpläre dä bulaçaq. Bu piket xaqında Başqortstan Tatar milli-mädäni moxtariäte räise urınbasarı, professor Mäcit Xucin menä nilär äytte.
Mäcit - Bez piketqa 27 aprel' könne tentülärgä duçar itelgän keşelär häm tağın 12 tatar oyışması citäkçeläre häm alarnıñ yärdämçeläre – cämğısı 30 lap keşe çığabız. Keşe xoquqların yaqlawçı häm Viktor Şmakovnı irekkä çığarunı taläp itkän lozunglar quyaçaqbız.Başqortstan Berläşkän oppozitsiäse wäkilläreneñ berse, professor Mäcit Xucin buldı. Mäcit äfände süzlärençä, Başqortstan xakimiätläre üz xakimlegen saqlap qalu häm üzlärenä süz tidertmäw öçen, yış qına qüät oyışmaların cämäğätçelekkä qarşı küsäk itep faydalana. Ufada oppozitsiä wäkillärenä qarşı soñğı könnärdä oyıştırılğan höcümnär dä şuña misal bulıp tora, di M. Xucin. “Şunı isäpkä alıp, Başqortstan oppozitsiäse koordinatsiä şurası äğzaları Rusiä prezidentı Putin isemenä häm Rusiä Federal' İminlek xezmäte başlığı Patruşev äfändegä maxsus xatlar äzerläde, - di Mäcit Xucin. – Ul xatlarda Rusiä İminlek xezmäteneñ Başqortstan bülege başlığı, general Çernokovnıñ xalıqqa tügel, ä urındağı xakimiätlärgä xezmät itüenä küp dälillär kiterelä”.
Şulay itep, şimbä töş waqıtında Ufada, Başqortstan İminlek xezmäte häm Başqortstan prokuraturası urnaşqan bina qarşındağı mäydanda piket başlana. İke säğät däwam itkän pikettan soñ, respublika oppozitsiäse wäkilläre jurnalistlar öçen açıq hawada uq matbuğat oçraşuı oyıştırırğa niätlänä.
