Elegräk tä xäbär itelüençä, Başqortstandağı kiñ bilgele tatar eşquarı häm cämäğät eşleklese, BR Tatar milli-mädäni moxtariäte räise Ramil Bignov uzğan yıl azağında Ufa üzägendä üz şirkäte tözetä başlağan binanı tatar gimnaziäse itep tözep beterü öçen tapşırırğa qarar itkän ide. Ämma Ufa şähäre xakimiäte, “başqalada tatar gimnaziäläre bar inde” digän añlatma belän cawap birep, bu binanı tözetügä qarşı çıqtı. Ä tizdän şuşı bina tiräsendä añlaşılmağan xällär başlandı. Bu bina tieşle dokumentlar räsmiläşterelmiçä tözelä, dip anı Başqortstan Arbitraj mäxkämäse sütärgä digän qarar çığardı. Şunnan soñ, sud pristavları ozatuında, binanı cimerü öçen, ike tapqır maxsus texnika da kiterelde. Ämma tatar milli xäräkäte wäkilläre, anda ike yulı da, qulğa-qul totınışıp, tere çılbır buldırdı häm anda texnikanı ütkärmäde.
Älege mäsälägä iğtibar cälep itü öçen, tatar oyışmaları citäkçeläre cıyılışıp, Rusiä Prezidentı Xakimiätenä maxsus möräcäğät äzerläde häm anı Mäskäwgä cibärde. İke tapqır piket ta oyıştırdılar. Şunnan soñ ğına binanı cimertü eşläre tuqtatıldı.
Bügenge köndä tatar gimnaziäse urnaşaçaq bina tiräsendä tınıç. Anı xätta räsmi terkäw öçen, Başqortstan terkäw palatasına dokumentlar da tapşırılğan. Gimnaziä binasın saqlap qalu komitetı äğzası, Başqortstannıñ “Aq qalfaq” tatar xatın-qızları oyışması citäkçese Kifaya Fazletdinova söyli.
Kifaya – Ufada bu tatar gimnaziäse kiräk. Aña ixtıyäc zur. Äle Mäsäküdän, federal' üzäktän bu mäsäläne kontrol'gä alğannan soñ, anı cimerüne tuqtattılar. Alla boyırsa, anı BR Tatar milli-mädäni moxtariäte milke itep terkäw eşläre dä başqarılır. Äle tieşle dokumentlar Terkäw palatasına tapşırıldı. Annan uñay cawap kötäse genä qala.
Başqortstan tatar xatın-qızlarınıñ “Aq qalfaq” oyışması citäkçese Kifaya Fazletdinova Ufadağı tatar gimnaziäse öçen tözelüçe bina tiräsendäge xällär xaqında söyläde.
