Başqortstanda yıl sayın köz başında respublikadağı sawlıq saqlaw ölkäse torışın tikşergän Xökümät şurası küçmä utırışı ütä. Här yılnı ayırım töbäktäge berniçä rayon bilämälärendä oyıştırıla ul. Bıyıl şundıy utırış respublikanıñ Kümertaw şähärendä, şulay uq Kügärçen häm Ziançura rayonnarında ütäçäk.
Başqortstanda sälämätlek saqlaw ölkäsendäge xällär totaş Rusiädä bulğan wäzğıyättän älläni ayırılmıy. Problemalar da, bu ölkägä xas kimçeleklär dä ber ük. Ufadağı xastaxanälärneñ matdi xäle, alarnıñ törle meditsina cihazları belän tä'min iteleşe yaxşıra barğan ber mäldä, Başqortstan rayonnarında xällär bik ük şäptän tügel. Küp kenä töbäklärdä xastaxanälär ör-yañadan tözekländerüne taläp itä. Alarda xätta tieşle darular häm zamança meditsina qorılmaları ğına tügel, ä qaysıberdä urın-cir öçen kiräk-yaraqlar da citmi.
Älege citeşsezleklärne respublika Sawlıq saqlaw ministrlığı wäkilläre ğomum Rusiä külämendäge problemalar qaytawazı dip añlata. Küplär federal' ministrlıqlarnı, şäxsän Zurabov äfändene dä sügä. Niçek kenä bulmasın, küp kenä mäsälälärne Başqortstannıñ üzendä dä xäl itep bula. Bu xaqta respublika premyer-ministrı Rafael' Baydäülätov sawlıq saqlaw ölkäsenä bağışlanğan küçmä utırışqa äzerlekne tikşergän kiñäşmädä çärşämbe könne açıq äytte.
Başqortstan Sawlıq saqlaw ministrı urınbasarı Säliä Morzabayıva ul kiñäşmä qısalarında jurnalistlar belän oçraşuda respublikada Sawlıq saqlaw buyınça däwlät proyektınıñ tormışqa aşırıluı xaqında söyläp, tabiplar belän tä'min iteleşneñ yaxşıruı häm başqa uñay üzgäreşlär xaqında äytte.
Morzabayıva – Şäfqät tutaşları, uçastok tabipları belän tä'min iteleş qayber urınnarda 40-50 protsent çaması ğına ide. Xäzer xezmät xaqları artqaç, tä'min iteleş yaxşırdı. Xätta qayber urınnarda kadrlar kiräkmi dä.Başqortstan Sawlıq saqlaw ministrı urınbasarı Säliä Morzabayıva fikerençä, däwlät proyektı qısalarında şäfqät tutaşlarına, uçastok tabiplarına xezmät xaqların arttıru awıl cirlärendä dä, şähärlärdä dä tabiplar belän tä'min iteleşne sizelerlek yaxşırtqan. “Moña qädär buş torğan eş urınnarı soñğı aylarda şaqtıy tulılandı, - di Säliä xanım. – Yuq qına aqçağa eşläp yörügä riza bulmıyça başqa eşkä küçkän tabiplar da kire üz hönärlärenä qayta”.
Morzabayıva – Bıltır darular belän tä'min itüdä özekleklär buldı. Monda bezneñ dä ğäyep bulmadı tügel. Darularnı qaytaruçı şirkätlär belän tözelgän kileşülär ütälep betmäde. Bıyıl isä bulğan xatalarnı isäpkä alıp eşlibez. Sez Başqortstan Sawlıq saqlaw ministrı urınbasarı Säliä Morzabayıva fikerlären işettegez. Başqortstanda sawlıq saqlaw torışın tikşergän Xökümät utırışı sentäber ayında ütäçäk. Ul cıyında şuşı ölkägä qağılğan kisken mäs'älälär kütäreler dip ömetlänä tabiplar.
