Ufada Watandaşlar cıyını uzdı. Ul Şähär mädäniät sarayında uzarğa tieş bulsa da, ğädättägeçä binanı birüdän baş tartqannar bulıp çıqtı. Säbäben tüşäm tözek bulmaw, anıñ keşelär başına töşü qurqınıçı belän añlatqannar. Cıyıluçılar şähär meriäse qarşında piket uzdırırğa, çaranı açıq hawada bulsa da uzdırırğa qarar itte.
Ufa xakimiäte binası qarşındağı Lenin mäydanında yartı säğätkä yaqın piketta torğannan soñ cämäğätçelek Başqortstan tatarları milli-mädäni möxtäriäte ixatasına cıyıldı. Anda 150 gä yaqın keşe qatnaştı. Oyıştıruçılar 19 oyışmadan, 24 rayonnan kilgän wäkillär qatnaşuın belderdelär. Qunaqlar arasında Rusiä eşçe kommunistlar firqäse liderı, Rusiä däwlät Duması deputatı Viktor Tyul'kin, Bötendönya tatar kongressınnan Räşit Yagfärovlar da bar ide. Tyul'kin çığışında Däwlät dumasına zur ömetlär bağlamasqa çaqırdı. Töbäklärdä ayırım problemalar milli tösmer ala, alarğa sıynfıy küzlektän bäyä birü döresräk bulır ide dide. Räşit Yagfärov Başqortstandağı “demokratiägä” ğäcäplänü belderde, mondıy bina problemaları belän berençegä oçraşuın äytte. Ul şulay uq yaña uqu yılınnan başqort telen mäcbüri uqıtuğa qaraşın belderep, tatarlarnı uqıtu moxtaclığı yuq, bulsa da qayber ayırımlıqlar turında ğına uqıtırğa bula dide. Mondıy mönäsäbätlärneñ ike millät arasında kierenkelek tudıru qurqınıçın bilgeläde.
Çarada qatnaşuçı başqa çığışlarda mäğärif problemaları, toraq-kommunal' häm başqa mäs'älälär xaqında süz bardı. Çara axırında rezolyutsiä, Rusiä häm Başqortstan Prezidentlarına möräcäğätlär qabul itelde. Rusiä Prezidentına möräcäğättä respublikanıñ statusın üzgärtü, anı ölkä-gubernya yasaw Başqortstannıñ Rusiägä quşıluına iñ zur bilge bulır ide dielä.
Watandaşlar cıyını räise itep Başqortstan urıslarınıñ “Rus'” oyışması räise Anotoliy Dubovskiy, särkätip itep Cirle üzidarälär fondı başı Robert Zahreevlar saylandı. Watandaşlar cıyını här öç ayğa ber uzaçaq, anda xalıq öçen ütä dä möhim bulğan sotsial' mäs'älälär qaralaçaq häm xaqimiätkä möräcäğätlär qabul iteläçäk. Oyıştıruçılar älege oyışmanı xakimiät häm xalıq arasında dialogqa bulışlıq itär dip ömetlänä.
