Uzğan yılda Tatarstanda 180 meñ keşe taşlamalardan baş tartqan ide. Bu respublikanıñ taşlamağa iä buluçılarnıñ yartısı digän süz. Xätta diabet, rak başqa qatlawlı awırular belän integüçelär dä däwlät yärdämen qabul itmäde. Alarğa isä ber tapqır däwalanu öçen genä dä berniçä yöz meñ aqça kiräk. Şulay da alarnıñ qayberläre barıber taşlamalar urınına aqça yäğni 500 sumnı qulay kürgän. Bu keşelär bilgele üz xatasın añladı.
Ämma wäzğıät bıyıl da älläni üzgärmägän. Haman da küp kenä invalid, suğış veterannarı taşlamalardan baş tarta. Yıl başınnan 57 meñ keşe taşlamanı aqçalata alğan. Küräseñ uzğan yıl keşelärgä sabaq bulmağan, di pensiä waqıtı wäkilläre. Älege taşlamalar keşeneñ sälämätlegen saqlawçı ber çara bulıp tora, di alar. Çönki alarnıñ xälläre bügen yaxşı ğına bulsa, irtägä ul naçarlanırğa mömkin. Şulay da nindi säbäplär keşelärne taşlamadan baş tartırğa mäcbür itkän soñ? Qayber keşelär monı taşlamalı darular arasında üzlärenä kiräkleläre bulmawı belän añlata. Taşlamalarnı aqçağa alıştıru protsessı başlanğanda darularnı kiterü belän qıyınlıqlar tuğan ide. Şuña kürä dä taşlamalarnı aqçalata alunı qulayraq kürgännär. Ä qayberläre aqçasızlıq, xäyerçelek arqasında. Qazanda yäşäwçe Läysän isemle xanım isä taşlamalı darulardan waz kiçüen bolay añlattı:
Minem awırunı däwalar öçen qimmätle darular kiräk. Ämma alar härwaqıt kiräk tä bulmasqa mömkin. Şuña kürä aqçalata alu bezgä caylıraq. Bezneñ aptekada ozın-ozaq çiratlarda torası kilmi, waqıt ta yuq. Bezgä kiräkle darular da älläni yuq anda.Elek çınlap ta aptekalarda taşlamalı darularğa qıtlıq bulsa da, bıyıl mondıy problema bulmas, di belgeçlär. Tatarstanğa ber milliard sumlıq taşlamalı darular kitergän. Bu uzğan yılğa qarağanda öç tapqırğa kübräk. Ä inde respublikada 60 meñgä yaqın keşe bu darulardan baş tartqan. Şulay da alarnıñ äle beraz uylarğa, üzläre öçen iñ qulay variant saylarğa waqıtı bar. Ämma berençe oktäbergä qädär alar xäl itärgä tieş.
Al'bina Zäynulla
