Accessibility links

Ufada Mostay Kärimne iskä aldılar


Başqortstannıñ xalıq şağire Mostay Kärimneñ wafatına tögäl ber yıl tuldı. Şuşı uñaydan atnakiç könne Ufada oluğ talant iäsen iskä alu çaraları bulıp ütte. Xäter çaralarında qatnaşu öçen, Ufağa xalıq şağireneñ törle taraflarda yäşäwçe yaqın tuğannarı, şul isäptän anıñ Mäskäwdä ğömer kiçerüçe ulı İlgiz ğailäse belän qayttı. Tatarstannan da bilgele yazuçılar, ğalimnär kilde Ufadağı iskä alu çaralarına.

Mostay Kärimne iskä aluğa bäyle räsmi çaralar töştän soñ anıñ Möselman ziratındağı qäberenä çäçkälär saludan başlandı. Anda respublikanıñ qayber yuğarı citäkçeläre, yazuçılar, icadi zıyalılar, ğalimnär, bik küp sanlı ädäbiät söyüçelär kilde. Qoyaşlı, matur kön ide. Xalıq şağireneñ qäbere yanı bixisap çäçkälär bäylämnärenä kümelde.

Kiçen Mäcit Ğafuri isemendäge Başqort däwlät akademiä drama teatrında Mostay Kärimne iskä aluğa bağışlanğan kiçä bulıp ütte. Älbättä, bar telägän keşene dä sıydıra almadı anıñ zalı. Tışta qalğan keşelär dä tağın ber zal tulırlıq ide äle.



Xäter kiçäsen Başqortstan xökümäte räise urınbasarı, Başqortstan mädäniät häm milli säyäsät ministrı İldus İlişev açıp cibärde. Mostay Kärimneñ Başqortstan ädäbiätendä ğına tügel, ä, ğomumän, anıñ XX ğasır tarixında tirän ez qaldıruı xaqında söyläp, xalıq şağireneñ istälegen mäñgeläşterü täñgälendä başqarıluçı eşlär turında da äytte ul. “Ufada anıñ isemendäge uram, anıñ isemen yörtüçe teatr häm başqort gimnaziäse bar xäzer, - dide ministr. - Kiläçäktä bu yünäleştä eşlär däwam itäçäk. Tizdän kürenekle şağir tuğan Keläş awılında anıñ yort-muzee da tözelä başlıy”.



Ufadağı xäter çarasına Tatarstannıñ xalıq şağire Robert Miñnullin da kilgän. Mostay Kärimne üzeneñ ostazı dip atıy ul häm Başqortstanda ataqlı şäxesne onıtmawlarına quanıçın belderä.



Robert:Mostay ağa wafat bulğaç, küñelgä törle uylar kilgän ide. Ädäbiätebez aqsaqalı kitkäç buşlıq bulmasmı, niçek yäşärbez digän uylar. Ämma ni ğäcäp, qurqularıbız yuqqa ğına bulğan. Mostay Kärim haman da bezneñ arada. Başqortstanda bu bigräk tä sizelä. Biredä anıñ istälegen mäñgeläşterü öçen küp eşlär başqarıla.

Mostay Kärimneñ wafatına ber yıl tuluğa bağışlanğan xäter kiçäsendä Başqortstannıñ bik küp yazuçıları da qatnaştı. Alarnıñ qayberläre säxnägä çığıp çığış ta yasadı, Mostay Kärimgä bağışlanğan şiğerlären dä uqıp işetterde. Başqortstan Yazuçılar berlege räise, xalıq şağire Rawil Bikbaev fikerençä, Mostay Kärim yöz yılğa ber tua torğan oluğ zatlarnıñ berse. Şuña kürä dä anıñ äsärläre ğasırlar däwamında ülemsez bulaçaq. Ä anıñ istälegen mäñgeläşterü yünäleşendä eşlär başlandı häm alar tağın da däwam itäçäk.

Bikbaev:“Mostay Kärim onıtılmıy. Xäzer anıñ isemendäge gimnaziä bar. Bez anı açu tantanasında qatnaştıq. Annan Milli yäşlär teatrına da anıñ iseme birelde. Menä törki telle teatrlarnıñ “Tuğanlıq” festivale barışında 15 sentäber könne anıñ isem tuyı bulıp ütte. Xäzer bu teatr Mostay Kärim isemen yörtä”.



Başqortstan Yazuçılar berlege räise Rawil Bikbaev buldı. Mostay Kärimne iskä alu kiçäseneñ Mäcit Ğafuri isemendäge Başqort däwlät akademiä drama teatrında ütüe oçraqlı tügel. Şuşı danlıqlı teatr säxnäsendä anıñ baytaq pe''saları quyıldı häm alar distä yıllar buyı säxnädän töşmäde. Äle xalıq şağiren iskä alu kiçäsendä dä teatr artistları anıñ şiğerlären uqıdı, qayber spektakl''lärdän monologlarnı işetterde. Ğomumän, äle ütkän cılı kiçä Mostay Kärimgä qarata xalıq söyueneñ ixlas häm sürelmäs buluın tağın ber qat rasladı.

XS
SM
MD
LG