Accessibility links

Кайнар хәбәр

Başqortstannıñ eçke eşlär ministrı urınbasarı häläk buldı


Başqortstannıñ eçke eşlär ministrı urınbasarı, ministrlıqnıñ tikşerü eşläre idäräse başlığı Vyaçeslav Sıs'nıñ säyer şartlarda häläk buluı, respublikadağı barlıq möhim waqiğalarnı da qaplap kitte. Cämäğätçelek arasında şuşı faciğa turında törle farazlar işetelä.



Başqortstan eçke eşlär ministrı urınbasarı Vyaçeslav Sıs'nıñ üleme xaqındağı xäbär säğäte-minutı belän taraldı. Yuğarı däräcäle militsiä xezmätkäre atnakiç könne kiçke säğät cidedä üzeneñ yortı yanındağı garajda ülgän kileş tabıldı. Ber säğät elek ul, Eçke eşlär ministrlıysınnan çığıp, öyenä qaytıp kitkän. Ufa yanında ere türälär häm bay eşquarlar yäşi torğan Çesnokovqa isemle kottedj awılına başqaladan ciñel maşinada nibarı 10 minut qına barası. Eştän çığar aldınnan Vyaçeslav Sıs' xatınına telefonnan şaltıratıp tizdän qaytıp citäçägen äytä. Ämma inde bilgelängän waqıtqa ire haman da qaytmağaç, xäläle kire Eçke eşlär ministrlığına şaltırata. Anda polkovniknıñ ber säğät elek ük qaytıp kitüe xaqında äytälär. Şunnan polkovniknıñ xäläle ire maşina quya torğan garajda kitä häm anda garaj eçendä ireneñ mäyeten genä kürä. Başına mıltıq belän atılğan bula anıñ. Gäwdäse yanında polkovniknıñ aw mıltığıda yatqan bula.

Faciğa bulğan urınğa Başqortstan eçke eşlär ministrı häm respubliqa prokurorı Sergey Xurtin citäkçelegendäge tikşerü törkeme kilä. Anda tikşerü eşläre comğa könne dä däwam itte. Ministr urınbasarınıñ häläk buluına bäyle törle farazlar äytelä. Berniçä kön elek kenä Eçke eşlär ministrlığınıñ selektor kiñäşmäse ütkän ide. Şul tämamlanğannan soñ, ministr Rafail Divaev Vyaçeslav Sıs'nı üz bülmäsenä çaqırtıp, tikşerü idäräse eşçänlegenä qarata bik qatı tänqit süzläre äytkänlege mäğlüm. Anda täğäyen genä ni xaqında süz baruın ministr üze häm märxüm genä beläder. Menä şul söyläşüdäge qatı süzlärne ministr urınbasarı kütärä almağandır häm üz-üzenä qul salğandır, digän farazlar iñ berençe bulıp äytelde. Ämma bu faraznı eçke eşlär ministrlığı wäkilläre şunda uq kire qaqtı häm Vyaçeslav Sıs' aw mıltığın tazartqanda, saqsızlıq arqasında, yalğış üzenä atqan, digän añlatma birergä aşıqtı. Ministrlıqnıñ matbuğat süzçese Ruslan Şäräfetdinov ta az süzle buldı. “Prokuratura alıp barğan tikşerügä bez añlatma birmibez”, - dip kenä cawapladı ul.

Comğa könne bu waqiğada beraz açıqlıq kerä başladı. Ministr urınbasarı ülem aldınnan ber keçkenä xat ta yazıp qaldırğan ikän. Ämma ul xatnıñ eçtälege xaqında bernindi dä mäğlümat birelmi. Älege dä bayağı “tikşerü eşlärenä zıyan kitermäü öçen” digän sıltaw qullanıla.

Şul uq waqıtta Başqortstan prokuraturasınıñ ayıruça möhim eşlärne tikşerüçese İrek Säetov jurnalistlar belän aralaşuda ministr urınbasarınıñ häläk buluına bäyle, cinayät kodeksınıñ 110 nçı maddäsenä yaraşlı cinayät eşe quzğatıluı turında äytte. Älege maddä “keşene üz-üzen üterügä kiterep citkerü”ne küz aldında tota. Dimäk, ministr urınbasarın barıber da üz-üzen üterügä kiterep citkergännär bulıp çığa. Bu xaqta mäğlümat alu öçen, bez prokuraturanıñ matbuğat süzçese Lyubov' Trofimovağa möräcäğät itkän idek. Ämma ul, älegä añlatmalar birü irtäräk digän sıltaw belän cawap birüdän baş tarttı.

Qayber kriminalist belgeçlär fikerençä, ministr urınbasarın ütergän buluları da ixtimal. Bu cinayätne bik şoma başqarıp, ezlärne bik osta yuğaltuçılar bulırğa da mömkin bu waqiğada, dip äytä andıy belgeçlär.

Niçek kenä bulsa da, bu faciğägä kiläçäktä barıber küpmeder açıqlıq kerer, möğayın. Härxäldä, bu ğädättän tış waqiğa, bolay da abruyı qaqşağan Başqortsan Eçke eşlär ministrlığın bizämi, älbättä.

Märxüm Vyaçeslav Sıs' belän xuşlaşu häm anı cirläw şimbä könne ul yäşägän Çesnokovqa awılında ütäçäk.

XS
SM
MD
LG