Rusiä tışqı eşlär ministrı Sergey Lavrov Könbatış illäre BMO İminlek Şurasında İrannıñ atom programması turındağı rezolütsiä ölgese belän İrannı cäzalarğa tırışa dip belderde.
"Qızğanıç ki, partnerlarıbız bezneñ mantıyqnı qabul itep xäzer xälne üz faydalarına üzgärtergä tırışa, rezolütsiäneñ başqa öleşlärenä İranğa qarşı çikläwlärgä härtörle qısalarnı yuqqa çığaruçı cömlälär kertergä teli. Häm bu tulısınça xoquqıy nigezle ölkälärdä dä İran belän säwdä-iqtisadıy mönäsäbätlärneñ tıyıluına kiterä ala" dide Lavrov.
Mäskäwdä üktän matbuğat oçraşuında Rusiä tışqı eşlär ministrı rezolütsiä ölgesendäge İran räsmilärenä säyäxät çikläwläre kertü täqdimen Rusiä qabul itmi dide. Bu rezolütsiä ölgesen Britaniä, Fransiä häm Germaniä äzerläde häm ul İminlek Şurasındağı barlıq 15 ilgä taratıldı. Veto xoquqına iä bulğan Rusiä häm Qıtaynıñ aña xuplaw beldermäwe säbäple rezolütsiä älegä tawışqa quyılmadı.
Lavrov yaqın arada Rusiä belän Gruziä arasında mönäsäbätlär yaxşırmas kebek, çönki Tiflis üzara kierenkelekne kimetü öçen bernindi ğämäli adım da yasamadı dide.
Lavrov Gruziä citäkçeläre Rusiä agressiä äzerli digän sıltaw belän Könbatışnıñ yaqlawına ireşergä tırışa dide häm Gruziäne Rusiägä qarşı säyäsättän baş tartırğa çaqırdı.
