İkençe yıl rättän Tatarstanda milli köräş buyınça turnirda Udmurtiädän dä sportçılar qatnaşa. 15-16 dekaberdä Qazanda bulıp uzğan turnirda Udmurtiä respublikasınnan da cide köräşçe köç sınaştı. Alarnıñ dürtese dürtençe urınnı yaulap, turnirnıñ diplomnarına layıq buldı.
İjawdan köräşçe Şamil Zakirov başqa ölkälärdän turnirda qatnaşuçılar bik köçle idelär, dip bäyä birde.
«Qazanda uzğan turnirda täcribä tupladıq, kiläse yılda yaxşıraq köräşergä niätem», dip urtaqlaştı Sarapuldan İldar Ğıyl''fanov.
Ütkän yılda Udmurtiä yegetläre komandası öçençe urın alsa, bıyıl alar undürt komanda arasında cidençe urın ğına yawladı.
Respublikanıñ milli köräş federatsiäse räise urınbasarı Al''fred Sabircanov monı aldan äzerlek alıp barılmawı belän añlattı.
Yuğisä, respublikada köräş buyınça federatsiä oyıştırıldı, ämma Qazanda turnirda qatnaşu öçen aldan äzerlek çaraları kürelmäwe, köräşneñ başqa törläre belän şöğellänüçe yegetlärne trenerları cibärmäskä qarar qabul itüläre turında citkerde. Yuğisä, yegetlär anda zur täcribä tuplap qaytır ide, dip assızıqladı fikeren.
Başqa regionnardan kilgän komanda sostavında irekle köräş belän şöğellänüçe yegetlär bar ide dip urtaqlaştı İjawdan Andrey Fadeev
Aşığıç räweştä komanda cıyıp bulmıy, älbättä. Şuşındıy turnir aldınnan respublikada saylap alu yarışları uzdıru da ğädätkä kerergä tieş, dip assızıqladı Al''fred Sabircanov. Köräşergä teläwçelär bar, alarnı oyıştırırğa ğına kiräk, Udmurtiädä 100 meñnän artıq tatar xalqı yäşi, alarnıñ ber protsentı ğına bu sport töre belän şögellänsä dä, köçe komanda bulır dip xıyallana Al''fred Sabircanov.
Dörestän dä, köräşergä teläwçelär bar. Alar tatar malayları arasında ğına tügel, başqa millät wäkilläre dä telep sölge belen bil alışa. Andrey milläte buyınça udmurt. Anı cide yäşendä ätise Sabantuyında mäydanğa alıp çığa, şunnan birle sabantuylarında bil alışam, ütkän yılda Musa Cälil isemendäge turnirda da qatnaştım, tağın da şöğellänep, yaxşı näticälärgä ireşäsem kilä, dip xıyallana Andrey.
Mäydan totarğa teläwçe yegetlär tatar ğailälärendä dä küp. Alarnı oyıştırırğa 19 yäşlek köräşçe Şamil Zakirov ta äzer.
Sarapulda, Mojgada köçle köräşçelär bar. Alar arasında İldar Ğıyl''fanov, abıylı-enele Kärimovlar. Alar älegä Tatarstannıñ Ägerce rayonı Keçek awılına barıp şöğellänälär ikän. Rayonnarda da milli köräş seksiäläre buldıru — federatsiäneñ maqsatı bulırğa tieş, dip xupladı Al''fred Sabircanov fikeren respublikanıñ milli säyäsät ministrlığınnan baş belgeç Fändüs Xucin.
Üzlegennän köräş belen şöğellänep, ştanga buyınça xalıqara sport masterı İldar Ğıyl''fanov köräş buyınça dönya çempionı Başqortstannan Yuri Sabanov belän köç sınaşqan. Soqlanıp küzättek, dip söyläde Fändüs Xucin.
Min tatar yegete, şuña köräş belän qızıqsınam. Şundıy zur turnirda berençe qatnaşuım, şöğellänep tağın ostalığımnı arttırırğa niätem dip urtaqlaştı İl''dar Ğıyl''fanov.
Köräş seksiälären buldıru öçen finanslar taläp itelä. Döres, fevral''dä şuşındıy turnirlarğa baru öçen küpmeder külämdä aqça bülengän. Tatar yegetläre dä küp yärdäm itä, dip bilgeläp ütte Al''fred Sabircanov.
Dimäk, bu eşkä oçraqlı qaraş tügel, ä cämğiät häm däwlät külämendä kiräkle eş itep qarağanda ğına uñışlar da yuğarı bulır ide. Malaylar yäştän çınığıp üssä, köräşep ciñä belergä küneger, törle yarışlarda da ciñüçelär isemlegendä Udmurtiädän qatnaşuçılarnıñ iseme bulır.
