Tatar milläteneñ ruxi ür tawın menä inde 454 yıldan birle işälär. Ber yaqtan monı rus şovinistları eşläsä, ikençe yaqtan tatar milläten üz tatarıbız cimerä. Tel yuğala dip sıqranabız, ğöref- ğädätlärebez yuqqa çığa dip täqrarlıybız. Şul uq waqıtta tatar üz öyenä tatar gäcit- jurnalların aldırmıy, tatarça kitap uqımıy, tatar telendä bulğan radio- telekanallarnı tıñlarğa, qararğa köç quymıy.
Cır tütälenä küz salsañ, awıl – millätebezneñ izge bişege. Tik menä eşlär şulay barsa, tatar awılında tizdän sanduğaçlar da rusça sayrıy başlar, axırı.
Samarda millätpärvarlarıbız bärelä- suğıla tatar balalarınnan ğına tuplanğan mäktäp açtılar, xäzer şul mäktäpne ike märtäbä zuraytu yözennän küp köç sarıf itelä. Ölkä häm şähär byudjetlarınnan 100 millionğa yaqın aqça alu yünäleşendä tir tügelä. Maqsat izge. Millionlı rus şähärendä tatar balasına milli möhit buldıru, telgä yörätü, ğöref- ğädätlärebezne islärenä señderü.
Ä ölkäneñ qayber awıllarında üzebezneñ ük tatarlar mäktäptä tatar telen uqıtuğa qarşı çığalar, tatar tele däreslärennän baş tartıp ğariza yazalar! Şundıy yämsez küreneşlärneñ berse Samar ölkäseneñ Poxvistnevo rayonına kergän ataqlı dürt mäçetle Ğali awılına qağıla. Ğali awılı urta mäktäbeneñ tatar tele uqıtuçısı Zölfiä xanım Asılgäräyeva söyli:
“ Mäktäpneñ ber sıynıfı inde ike yıl tatar telen uqımıy. Äti- äniläre ğariza yazıp birdelär. Tatar telennän baş tarttılar.”
Şundıy uq yämsez xäl ölkäneñ Yaña Usman urta mäktäbendä dä bula yazğan. Yarıy äle direktor qatı torğan.
Tatar tele uqıtuçısı Gölfiä Märdäğäläm qızı söyli:
“ Ata - analar talpınıp qarağannar ide tatar telen uqıttırmasqa, direktor barçasın da urınnarına quydı.”
