Accessibility links

Başqortstanda bäyrämnär däwam itä


Başqortstanda Yaña yıl bäyräme belän başlanıp kitkän yal könnäre däwam itä. Rayonnarda häm şähärlärdä bäyräm çaraları ölkännär öçen dä, balalarğa da kön dä oyıştırılıp tora. Äle Ufada törle rayonnardan kilgän balalar berniçä şifaxanädä yal itä. Alarnı törle säyäxätlärgä alıp çığalar, Çırşı bäyrämnärenä alıp baralar, Sirktağı tamaşalarnı kürsätälär. Küp balalı ğailälär, ata-anasız qalğan balalarğa ayıruça zur iğtibar birelä.



Ölkännär öçen dä Ufadağı törle Mädäniät sarayları, filarmoniä häm teatrlar maxsus bäyräm programmaları äzerläde. İske Yaña yılğa qädär däwam itäçäk alar. Ä 7 ğinwar könne pravoslav xristiannarnıñ Raştua bäyräme başlana. Şuşı uñaydan Başqortstannıñ barlıq çirkäwlärendä bäyräm çaraları, ğibädät qılular oyıştırılaçaq. Başqortstan pravoslavları başlığı, Ufa häm Stärletamak Arxiepiskobı Nikon ataqay din qärdäşlären şuşı olı bäyrämnäre belän qotlap möräcäğät itte. Anda ul uzğan yılnıñ Başqortstan pravoslav dinen totuçılar öçen uñışlı bulğanlığın äytä.

Başqortstan pravoslavların Raştua bäyräme belän respublika Prezidentı Mortaza Räximov ta qotladı. Respublika matbuğat çaralarında dönya kürgän bu möräcäğättä ilbaşı üzeneñ iñ izge teläklären citkerä. “Başqortstanda bezneñ yaq öçen ğädäti bulğan barlıq dinnärgä ışanuçılar arasında üzara äybät mönäsäbätlär urnaşuı quanıçlı, - di Räximov äfände. – Bu xäl cämğiättä üzara añlaşuğa, tınıçlıqnı, kileşep yäşäwne häm totrıqlılıqnı saqlawğa häm nığıtuğa bulışlıq itä”.

Prezidentnıñ süzläre xaq – Başqortstanda dinnärara tatulıq yäşäp kilä. Törle konfessiälär başlıqları arasında da gel üzara añlaşu, qayber çaralarda bergäläp qatnaşu da küzätelä. İñ zur küpçelege İslam dinen häm pravoslavie dinen totuçılar elek-elektän bergä yäşägän töbäk bulğanğa, ğadi xalıq arasında ber-bereñneñ dinen xörmät itü yäşäp kilde. Şulay da törle çorlarda Rusiä türäläre başbaştaqlığı dinnärne säyäsätkä buysındırırğa omtıldı.

XS
SM
MD
LG