Accessibility links

Кайнар хәбәр

Omskida Tatarstan delegatsiäse


6-7 fevral' könnärendä Omskida eşlekle vizit belän Tatarstannan räsmi delegatsiä bulıp kitte. Delegatsiä sostavında Tatarstan Respublikasınıñ iqtisat häm säwdä ministrlığınıñ xalıqara häm regionara üseş idäräse başlığı Aydar Abdraxmanov, “Nijnekamskşina” şirkäte wäkilläre: “Qama” säwdä yortı direktorı urınbasarı Yevgeniy İstomin häm älege yortnıñ äydäp baruçı menedjerı Sergey Mnogosmıslov buldılar. Tatarstan wäkilläreneñ Omskiğa kilüläre Qazanda uzğan yılnıñ 7 dekaberendä ütkärelgän “Tatarstannıñ eşlekle partnerları” forumı barışında bulğan söyläşülär näticäsendä mömkin buldı.

Tatarstan delegatsiäsen Omskida ölkäneñ iqtisat ministrı urınbasarı Vladimir Fedorov qabul itte. Annan soñ delegatsiä qatnaşlığında ölkä xakimiäte orğannarı wäkilläre, eşmäkärlär qatnaşında “tügäräk östäl” utırışı ütkärelde, tatar eşmäkärläre häm cämäğätçelege belän oçraşu oyıştırıldı

Mäğlüm bulğança, Omski ölkäse belän Tatarstan respublikası arasında iqtisad, säwdä, texnika, fän häm mädäniät ölkälärendä bäyläneşlärne nığıtu maqsatınnan 2000-nçe yılnıñ mayında kileşü tözelgän ide. Xäzerge waqıtta Omski ölkäse belän Tatarstan arasındağı bäyläneşlär şaqtıy cayğa salınğan, tovar äyläneşe dä yıldan-yıl üseş ala. Mäs'älän, ike region arasındağı tovar äyläneşe 2000 yılda 409 mln rubl' täşkil itkän bulsa, 2005 yılda 1 mlr 873 mln rubl'gä citte. Ämma bu san, Tatarstannıñ uzğan yıldağı tovar äyläneşeneñ 143 mlrd çaması buluın isäpkä alğanda, anıñ 1,5%-ın ğına täşkil itüen kürsätä. “Bügenge köndä ike yaqnıñ da uzara mönäsäbätlärne üsterü rezervları bar, xezmättäşlek potensialı tulısınça qullanılmıy. Bez nefteximiä häm maşinalar eşläp çığaru sänäğäte buyınça bäyläneşlärne üsterüne dä zarur dip sanıybız,-dide Tatarstan delegatsiäse citäkçese Aydar Abdraxmanov tügäräk östäl oçraşuı barışında.

“Tügäräk östäl” söyläşüendä qatnaşqan Omski eşmäkärläre, predpriätielär wäkilläre häm tatar eşquarları da üzara mönäsäbätlärne kiñäytü maqsatı belän barlıq täqdimnärne dä eçenä alğan berketmä tözergä häm yıl axırına qadär anı imzalarğa kiräk dip belderdelär.

Tatar cämäğätçelege häm eşmäkärläre belän bulğan oçraşuda Qazan qunaqların Omskidağı tatar xäräkäteneñ torışı häm oyışmalarnıñ eşçänlege belän tanıştırdılar. Mädäniät turında söylägän Ğafiä Aleeva da, uqu-uqıtu problemaların bilgeläp ütkän Gölsinä Äxmerova da, ölkädäge tatar mäğlümat çaraları belän tanıştırğan Saniä Mirxaleewa da häm başqa çığış yasawçılar da, tatar cämäğätçelegeneñ eşlären uñışlı alıp baru öçen mätdi keremnär buluı zarur,- dip belderdelär.Tatar balaları telne, mädäniätne, tarixnı belep üssennär öçen tatarlarnıñ zamança texnika belän cihazlandırılğan binası bulırğa tieş,-didelär çığış yasawçılar.

Ölkä Qanunnar çığaru cıyılışı deputatı Rawil Bikbavov üzeneñ çığışında berniçä yıl elek tatar eşmäkärläreneñ, Tatarstan belän bäyläneşkä kerep, TatOm säwdä yortı oyıştıruları turında söyläde. “Kileşülär dä tözelgän ide, ämma eş barıp çıqmadı. Xäzerge oçraşu däräcäleräk bulırğa oşıy, yaña keşelär, yaña eşmäkärlär bälki eşne cayğa sala alırlar” ,- dip yaña bäyläneşlär urnaşuğa ömet bağlawın belderde.

Oçraşular barışında Omski ölkäsendä tatar cämäğätçelegenä yärdäm itü mömkinlekläre dä qaraldı. Aydar Abdraxmanov şundıy mömkinleklärneñ berse dip eşmäkärlär assotsiatsiäsen tözüne sanıy. Ğomum alğanda, barlıq oçraşular da uñışlı ğına uzdı häm qatnaşuçılar qänäğät qaldılar kebek. Kiläçäktä nindi üzgäreşlär bulır, eşlär uñışlıraq barırmı - waqıt kürsäter.

Rozaliä Sayganova, Omski

XS
SM
MD
LG