Başqortstanda tağın da salım xezmäte idäräse başlığı almaşındı. Xäzer bu känäfigä şuşı idärädä 1994 yıldan birle eşlägän, ä 2003 yıldan birle idärä başlığı urınbasarı wazıyfaların başqarğan Ol'ğa Afanas'yewa täğäyenlände.
Şunısı ğibrätle – aña qadär bilgelängän başlıq bu cawaplı wazıyfanı tulır-tulmas ber ay ğına başqarıp qaldı. Elegräk tä xäbär itelüençä, Rusiä Federal' Salım xezmäteneñ Başqortstandağı İdäräse başlığı itep ber ay elek kenä Qazannan kiterelgän Aynur Äydeldinov täğäyenlängän ide. 8 fevral'dä ul üz teläge belän şuşı wazıyfadan alularnı sorap ğariza yazğan häm ul qänäğätländerelgän.
Aynur Äydeldinovnı Başqortstanda berençe könnärdän ük önämädelär. Eş monda anıñ yaxşı yäki naçar citäkçe buluında da tügel. Çönki äle ul eş kürsätergä dä ölgermägän ide. Monda ğillä başqada – Aynur Äydeldinovnı Başqortstan Salım xezmäte idäräsenä täğäyenläw mäsäläsen Mäskäw citäkçeläre Başqortstan räsmi xakimiätläre belän kileşep eşlämägän ikän. Härxäldä, Aynur Äydeldinovnı Qazanğa kire qaytıp kitärgä çaqırğan keşelär – respublikada bıltır köz oyıştırılğan “Federativ Rusiä öçen” digän ictimaği xäräkät wäkilläre şulay belderä kilde.
Mäğlüm ki, älege xäräkätneñ nigezen Başqortstandağı başqort milli oyışmaları täşkil itä. Näq menä alar bik yarsıp Başqortstandağı salım xezmäte başlığı itep çittän kiterelgän keşeneñ bilgelänüenä qarşı çıqtı häm Ufada berniçä tapqır piketlar da oyıştırdı. Älege uram cıyınnarınıñ räsmi televidenie kanallarında köne-töne yaqtırtıluı isä bu çaralarnıñ artında respublikanıñ räsmi orğannarı torğanlığına işarä ide. Xäyer bu mäs'älädä tärtip buldırunı sorap Başqortstan parlamentı da möräcäğät qabul itkän ide.
Başqort milli säyäsäten ütkärüdä başlap yörüçelär bulğan “Ural” başqort xalıq üzäge, Başqort yäşläre berlege häm “Aq tirmä” başqort milli-mädäni üzäge xätta şuşı mäsälägä qağılışlı Rusiä Prezidentı Vladimir Putinğa açıq xat ta qabul itte häm tarattı. Ul xatta Rusiägä Başqortstannan salım tüläwlären tuqtatuğa da çaqırular bar ide. Dimäk, bu oçraqta başqort milli oyışmaları Mäskäw Kremlen çınlap ta örkette bulıp çığa kebek. Bu xälgä Başqortstandağı tanılğan ğalim, etnosäyasät belgeçe İldar Gabdrafıykov başqa törleräk añlatma birde
“Bu xällär astında Başqortstan belän Mäskäwneñ keläm astı uyınnarı yata şikelle. Häm bu uyınnar Başqortstannıñ yağulıq-neft'eşkärtü tarmağına bäyle. Dimäk, Mäskäw belän bu xaqta nindider kileşügä kilengän. Ä Aynur Äydeldinov bu uyında üz rolen uynağan häm xäzer anıñ kiräge betkän”. Äye, Başqortstanda Salım xezmäte idäräse başlığı wazıyfaların başqaruçı yaña keşe bilgelände. Läkin monıñ belän genä älege idärä tiräsendäge ğauğa tuqtalmas kebek. Çönki yaña bilgelängän başlıq Ol'ğa Afanas'yewa da tulı xoquqlı başlıq tügel, anı da başlıq wazıyfaların başqaruçı dip kenä täğäyenlägännär. Ä bu mäsäläne quyırtıp piketlar oyıştırğan xäräkät wäkilläre bu urınğa daimi citäkçe kiräk dip tä däwalıy.
