- Kemne quyuları minem öçen barıber tügel älbättä. Ul Tatarstan keşese bulsa, bik äybät bulır ide dip uylıym. Çönki ul tatarnı, anıñ traditsiälären belä. İñ möhime, ul Tatarstannı belä.
- Min çittän kilgän keşene monda kürergä telämäs idem. Tatarstan prezidentı bulıp şuşı respublikada yäşägän, anı yaxşı belgän keşe bulsa, bu iñ yaxşı variant bulır ide.
- Miña qalsa kemne quysalar da riza. Ämma älege prezident tizräk kitsen. Çönki Tatarstanda tormış awır. Tuq açnı añlamıy digändäy, alar bezne añlamas inde. Ämma üzgäreşlär bik kiräk! Başqa keşene quysınnar, bälki berniqädär caylanır tormışlarıbız.
- Şäymiev kitär inde, ul mäñge prezident bulıp tora almıy. Ä menä ul kitkäç, Mäskäw dairäläre bilgele üz keşesen quyarğa omtılaçaq. Çönki alarğa säyäsätneñ tışqı yağın ğına tügel, ä xalıqqa kürenmi torğan eçke yağın da ütkärergä kiräk bu töbäktä. Ä Tatarstan ul Mäskäwneñ eşmäkär, bik täcribäle töbäge. Ämma minem uylawımça, respublikadan çıqqan wäkil prezident bulsa yaxşıraq bulır ide. Çönki bit ul Mäskäwdän kilgän keşe ul säyäsätne, anda bulğan kiräk-yaraqlarnı şul yaqqa tartu digän süz.
- Tatarstanda prezident itep quyarlıq menä digän keşelär bar. Şul uq Färit Möxämmätşin, Metşin, Minnexanov häm başqalar. İñ berençe çiratta çın mäğnäsendä tatar bulğan keşene täqdim itärgä kiräk.
Al'bina Zäynulla
