Bıyıl yaz Başqortstandağı baytaq qına töbäklärdä häm Ufanıñ üzendä dä köçle su basular kötelüe xaqında aldan uq farazlar äytelgän ide. Yurawlar yuş kilde. Soñğı könnärdä, tuqtawsız ayulağan yañğırlar arqasında, Ağidel häm Qaraidel yılğalarında su küläme kisken arttı. Äle Ağidel yılğasınıñ bieklege 900 santimetrğa qädär kütärelde. Bu xaqta Ufa şähäreneñ grajdannar iminlege idäräsendä ütkän kiñäşmädä äytelde.
Kiñäşmädä bilgelänüençä, xäzerge köngä Ufa yanındağı 2 meñnän artıq şäxsi yortlarnı su basqan. Alarda xäwefsezlek öçen elektr energiäse birüne dä özgännär. Şulay bulsa da, küp keşelär üz yortların waqıtlıça ğına bulsa da, qaldırıp kitüdän baş tarta. Gärçä respublikanıñ Ğädättän tış xällär ministrlığı törkemnäre xalıqnı berniçä genä köngä bulsa da başqa cirdä yäşäp torırğa öndäsä dä. Alarnı da añlap bula - küp ğailälär üz yortlarına qaraqlar töşüdän qurqa.
Su taşqını respublikanıñ başqa töbäklärenä dä zur zıyan sala. Ayıruça Äbcälil häm Ziançura rayonnarında su ağımı köçle. Alarda da yözlärçä şäxsi yortlar su astında torıp qalğan. Ğädättän tış xällär ministrlıysında äytülärençä, su taşqını aldağı öç köndä tağın da kütärelüen däwam itäçäk häm anıñ bieklege 950 santimetrdan da artıp kitäçäk. Annan soñ ğına kiläse atna başında su taşqını kire çigenä başlarğa mömkin dilär.
Äle kinät su basqan urınnardan maxsus texnikada keşelärne häm yort xayvannarın, terleklären xäwefsez urınnarğa çığaru öçen mömkinleklär citärlek, dilär respublika qotqaruçıları. Su taşqını kitär, ämma keşelärneñ yortlarına, baqça bilämälärenä kiterelgän zıyannı qaplawı ğına bik awırğa töşäçäk. Çönki bu eştä xökümätneñ yärdäme qaralmağan. Härkem üz yort-ciren straxovkalağan bulsa ğına aña ömet itä ala. Ä küp ğailälär, älege dä bayağı aqça citmäw arqasında, iminiät kileşüen tözemi.
