Ölkä mäktäplärendä xezmät itüçe 94 uqıtuçığa “Mäğärif” isemle ilküläm proyekt qısalarında 100 meñ rubl'lek grantlar tapşırılaçaq. Alar arasında berniçä millättäşebez dä bar.
Tik şunısı da iğtibarğa layıqtır: tatar millätennän bulğan andıy 6 uqıtuçınıñ 4е qatnaş xalıqlı urıs awıllarınıñ urıs mäktäplärendä tatar balaların da urısça törle fännärgä öyrätü belän mäşgul': biologiä, ximiä, ingliz tele, urıs tele… Alardan ayırmalı bularaq, Xämdiä Fäyzullina İske Qulatqıda tatar balaların ğına uqıta. Urısça bulsa da, qayber terminnarnıñ tärcemäsen dä birep.
İske Mayna rayonı Pribrejnoe awılı mäktäbeneñ urıs tele uqıtuçısı Qaşaf Zäynetdinov urıs mäktäbendä tatar balaların milli mädäniät belän tanıştıru maqsatınnan tügäräk tä oyıştırıp cibärgän. Ä menä 30 yıllıq ğomeren Zur Çirkle mäktäbendä ana telen uqıtuğa bağışlağan Näsixa Yahudinanıñ da büläklänüen tatar cämäğätçelege ayıruça şatlanıp qabul itte. Näsixa xanım tel saqçısı bulıp üz awılına ğına tügel, böten Nikolaev rayonı tatarlarına xezmät itä: rayonda ana tele uqıtuçıları metodik berläşmäseneñ citäkçese dä bit ul. Häm 5 mäçetle Zur Çirkle awılınıñ çın möselmança yäşärgä tırışuında da Näsixa Yahudinanıñ xezmäte zur, di awıl xalqı.
