Bu atna azağında Başqortstanda xalqıbıznıñ milli bäyräme – Sabantuylar qırıqqa yaqın rayonda ütäçäk. Alarğa respublikanıñ yuğarı citäkçeläre, BR Däwlät Cıyılışı deputatları, Xökümät wäkilläre dä bara häm urınnardağı xalıqnı qotlap, xezmät aldınğılarına büläklär dä tapşıraçaq.
Sabantuylar Başqortstanda may ayınıñ soñğı atnasında uq başlanıp kitkän ide. Uzğan atna azağında da berniçä rayonda häm şähärdä milli bäyrämebez bik zurlap bilgelände. Büzdäk rayonı üzäge oyıştırğan Sabantuyğa premyer-ministr Rafail' Baydäülätov barıp bäyräm şatlığın urtaqlaştı.
Sabantuy bäyrämnäre uzğan rayonnarda cirle xakimiätlär, här yıldağıça, bik küp bäygelär oyıştıra, xezmät aldınğıların xörmätli häm alarğa qimmätle büläklär, aqçalata premiälär tapşıra.
Här cirdä, törledän-törle bäygelär belän bergä, kön ozını cır-moñ yañğırıy. Yazğı eşlärneñ uñışlı tämamlanuı da milli bäyrämebezneñ yämen arttıra, käyeflärne kütärenke itä.
Bıyılğı soñğı sabantuylar Başqortstannıñ tağın da berniçä rayonında kiläse atnada uzaçaq. 15-17 iyün könnärendä Çaqmağış rayonında “Salawat cıyını” digän bäyräm barışında da Sabantuy bäyräme bula. Anda respublikanıñ törle töbäklärennän kilgän yözlärçä qunaq ta qatnaşaçaq.
