Accessibility links

Кайнар хәбәр

İstanbulda Tatarstan mädäniät könnäre uzdı


Bıyıl da Tatarstan Mädäniät Ministläre belän İstanbul Böyek şähär bälädiyä citäkçelegeneñ xezmättäşlege arqılı “Tatarstan Mädäniät Könnäre” uzdı. Bu inde yalğışmasaq öçençese.

Tatarstan mädäniät ministrı urınbasarı Ayrat Cäbbarov citäkçelegendä räsmi häm icadi delegatsiya 7-nçe İyündä Taksim mäydanında Tatarstan könnären açuda qatnaşları. Mäydanda Tatarstan Däülät cır häm biyu ansamble, "Bäxetle balaçaq" balalar kollektivı çığış yasadılar. Tatarstan icadi törkemendä,şağir häm deputatlar Renat Xarisov belän Robert Miñnullin, şulay uq şagıyr, "Mädäni comğa" gazetası baş möxärrire Zinnur Mansurov, kürenekle kompozitor Almaz Monasıpov häm başqalar bar ide. İke säğät däwam itkän konsertnı Rossiä Federatsiäse Başkonsulı Aleksandr Krivenko da qaradı. Çaqırılğan qunaqlar häm başqalar öçen 100-200 tiräsendä utırğıç xästerlängän bulsa, ber 300’läp keşe dä ayaq ürä torıp konsertnı qaradı.

8-nçe İyündä isä kiçä Cämal Räşit Rey isemendäge zalda "Küçmä törgäklär " Xalıqara sınlı sängät proyektınıñ kürgäzmäse açıldı. Monnan tış dürt ayarım tartmağa urnaştırılğan tatar sınlı sänğätennän ürnäklär xiç tä şaqqatırulıq tügel ide, başlıça çigelgän tübätäylär belän Qazanda qayada satılmağan çikkän çiteklär bar ide. Xalıqqa çäkçäk tä taratıldı. İseme ni xätle kokteyl, yäğni fuşer bulsa da, ber tamçı alkogol’le eçemlek tä yuq ide. Çönki dinçe AK partiä xakimiäte xalıqnı xaramdan saqlamaçı bula.

Zalda da konsert başlanır aldınnan Rosiä Federatsiäseneneñ Ankaradağı ilçese Vladimir İvanovskiy,”2007 Törkiädä Rossiä Mädäniät Könnäre yılı, menä Tatarstannıñ bu vizitı da şuşı ramlarda ütkärelä” dide. Ul häm qalğan räsmi şäxeslärneñ ğädäti çığışlarınnan soñ bezneñ şağirlär çığış yasap üz şiğerlären uqıdılar. Tabiği niçä törek añladı belmibez. Ütkän yıldağı kebek ike ilneñ dä mädäniät ministerläre Attila Koç belän Zilä Veliävanıñ Tatarstan Mädäniät Könnärenä qatnaşmawları, Törek yağınnan tübän däräcäle ber ike çinovniknıñ buluı Tatarlarğa iğtibarnıñ töşüe dip me bäyälärgä belä almıybız. Läkin konsert bik uñışlı buldı. Röstäm Әbäzov citäkçelegendäge "La Primavera" orkestrınıñ çığışı yaratıp tıñlandı. Bigräktä Tatar cırçıları köçle tawışları belän zur alqış cıydılar. Törkiädäge Tatarlarnı iñ qızıqsındırğan çığış isä “Tatarlarnıñ Törkiägä küçülären surätlägän lirik teatral” spektakl ide. Inde ilen, tuğanların Rus zolmennän qotılu öçen taşlap kitärgä mäcbur bulğannarnıñ näselennän kilgännärgä bu spektakl bik täsir itte. 800 urınlı zal şığrım bulmasa da tulğan ide. Konsert azağında milli marşıbızğa, grimıbızğa äwerelgän “Tuğan tel”ne barlıq tamaşaçılar, şul isäptän Rus räsmi delegatsiäse dä ayaq ürä basıp torıp tıñladılar.

9-nçı iyündä isä İstanbulnıñ Belgrad urmanında Sabantuy ütkärelde. Biredä Tatarlar az bulsa da, AK partiäne yaqlawçılar tulğan ide. Döres protokolda da küp keşe bar ide. Räsmi çığış yasawçılar arasında tik ber räsmi bulmağan keşe Prof. Nadir Däülät Törkiä Tatarları isemnän çığış ta yasadı. “Intertat.ru” ni öçender bu turıdağı xäbärlärendä Törkiädäge tatarlarnı bik iskä alunı kiräk tapmağan, tabiği räsmi ber organnan başqa närsä dä kötep bulmıy. Tatarstan cır häm biyü ansamble, La primavera orkestrımı häm “bäxetle balalar” truppası, inde öç kön art artqa “Tatarstan Mädäniät Könnärenä” kileşülär öçen bik qızıqlı bulmasa da, ber ük biyü häm cırların bu yulı Sabantuyğa kileşülär öçen başqardılar. Tik “Kocaeli Tatarları Oyışması”nıñ balalar fol’klor truppasınıñ çığışı zur qızıqsınu tudırdı. Tatar köräşen dä ber Qırım Tatarı cigeteneñ otuı Qazan belän Qırım arasındağı ruxi, mädäni häm tarixi bäyläneşneñ ber çağılışı buldı. Bit Başqortlar tağın da yaqınraqlar, ämma alar ütän yılda bulğanı kebek bıyıl da 2-nçe iyündä Tatarlardan ayrım sabantuy ütkärdelär. Inde qayçan bu ike xalıq aqılğa basar ikän? Urtada büleşerlek baylıq mı bar yäki bäysezlek me? Sabantuy ğädät buyınça “Tuğan tel” milli marşı belän azaqlandı, ämma Tatarstannıñ üzendä bu milli rux birelmäw aqıllı Törkiägä uqırğa kilgän Tatar studentları üz ara söyläşep, ayaqqa da basunı kiräk tapmıyça marşıbızğa iltifat itmädelär. Bälkim alarnıñ bere dä Tatarça belmi torğandır. Şulay da “Tatarnıñ kiläçäge bu yäşlärgä me tapşırılaçaq?” digän sorawnı birmiçä bulmas.

Bıyılda Törkiädäge Tatarstan wäkilçelege citäkçese Radik Gimatdinov, anıñ urınbasarı İlşad Nazipov häm Ruşaniya Altay şuşı mädäniät könnäreneñ uñışlı ütüenä bik küp köç saldılar. 10-nçı iyündä isä Sultanahmet mäydanında konsert qabatlandı.

Әxtäm İbrahim, İstanbul

XS
SM
MD
LG