Sişämbe könne Tatarstan prezidentı Şäymiev respublikanıñ iñ layıqlı studentları häm aspirantları belän oçraştı. Şuşı oçraşu waqıtında prezident uquda häm ğilmi eşçänlektä kürenekle näticälärgä ireşkän yäşlärgä isemle premiälär tapşırdı. Yäşlär öçen bik möhim bulğan älege berniçä meñ sumnı täşkil itkän premiä 60 keşegä birelde. Şulay uq älege oçraşuda süz xäzerge waqıtta studentlarnıñ, yäş ğalimnärneñ problemaları turında da bardı. Prezidentqa häm xökümät wäkillärenä yäşlär stipendiäneñ äz buluı, tulay toraqlarda urın citmäwe, eşkä urnaşu probleması kebek moñ-zarların citkerdelär.
