Britaniä Ğiraq mäsäläsendä kompromis rezolutsiä täqdim itergä mömkin

Berläşkän Millätlär Oyışmasınnan kilgän xäbärlärgä qarağanda, Britaniä Ğiraq mäsäläsendä compromis rezolutsiä täqdim itergä mömkin. Bu turıda bügen mäglümät çaraları, isemnäre äytelmägän diplomatlarğa tayanıp xäbär itte. Älege rezolutsiä Ğiraqqa qoralsızlanu öçen östämä qısqa waqıt bireregä mömkin. İminlek Şurası äğzaları, mondıy compromis rezolutsiäne xuplarğa mömkin, dielä. Bu xäbärgä Quşma Ştatlarnıñ qaraşı älegä bilgesez.

İminlek Şurasınıñ daimi äğzaları bulğan Fransiä häm Rusiä, Ğiraq mäsäläsendä yaña rezolutsiägä qarşı çığa. Kiçä Fransiä, Rusiä häm Germaniä Tışqı eşlär ministrları – İminlek Şurasında yaña rezolutsiäne ütkärmiäçäklären belderde. Rusiä belän Fransiä, kiräk bulsa, veto salu ixtimalın da äytte.

Bügen Qıtay räsmiläre 3 ilneñ urtaq belderüenä xuplaw belderde. Qıtay Tışqı eşlär ministrı Tañ Cia-huan, qoral inspektorlarına kübräk waqıt birergä kiräk, yaña rezolutsiäneñ kiräge yuq, dip äytte. Ämmä ul, veto salu mäsäläsen urap ütte:

Audio: Vetoğa kilgändä, bezneñ praktika şul, di Tañ – mäsäläne bar yaqtan tikşerep, Qıtaynıñ tışqı säyäsäte häm xalıq mänfägätennän çığıp, Pekin möstäkqil qarar qabul itäçäk.”

Tañ süzlärençä, Qıtay Ğiraq krizisın tınıç yul belän xäl itü öçen, qulınnan kilgänen eşliäçäk.

İrtägä BMOnıñ baş qoral inspektorları Hans Blix häm Möxämmät Äl-Baradei İminlek Şurasında Ğiraq turında çirattağı xisapların totaçaq.