Accessibility links

Кайнар хәбәр

Brusseldä Yevropa Berlege citäkçeläre saqlanu säyäsäten nığıtırğa kileşte


Yevropa Berlege citäkçeläre bügen yuğarı däräcädäge ike könlek oçraşunı tämamlıy. Citäkçelärneñ kübese jurnalistlarğa üz añlatmaların birüdän tıyılıp qaldı. Bügen kiçen Yevropa Berlege citäkçeläre berlekkä namzät illär wäkilläre belän oçraşa. Annan alda humanitar yardäm häm iqtisadi reformalar turında söyläşülär bara. Kiçä Berlek Ğiraqqa 20 million yevrolıq humanitar yardäm cibärergä kileşte.

Berlek summitı qısılarında çığış yasap Britaniä premyer-ministrı Tony Blair, Ğiraqta xärbi kampaniä aldan planlaştırılğança bara, läkin tiz waqıt eçendä genä ciñügä ireşep bulmas, dide. Ğiraq köçlärennän qarşılıq kötärgä kiräk, dide Blair. Şulay uq, suğıştan soñ Ğiraqnı tözekländerügä Yevropa üz öleşen kertergä tieş, dip östäde Britaniä xökümäte başlığı.

Germaniä kanslerı Gerhard Schroeder Ğiraq tiräsendäge krizis sürätendä Yevropa Berlege üzeneñ saqlanu säyäsäten nığıtırğa tieş, dip belderde. Brusseldä uzğan summitnıñ yabılu utırışında Schroeder Germaniä , Fransiä häm Belgiä qatnaşında Berlekneñ saqlanu säyäsäte mäs’äläsendä ayırım oçraşuı uzdıru turında Belgiä täqdimen xuplap çıqtı. Bu 3 däwlät berdäm fikerdä tora, dide Germaniä kanclerı: Yevropada Saqlanu häm İminlek Säyäsäten buldırudan kemne dä bulsa çitläşterü turında süz barmıy. Bezneñ belän xezmättäşlek itergä yä bäxäsläşergä teläwçelär öçen söyläşülär açıq bulaçaq. İkençedän, bu-NATOğa qarşı ğamäl dä tügel. Bu adımnı Yevropa bağanası belän NATOnı nığıtu bularaq añlarğa kiräk, dide Germaniä kanslerı. Germaniä eçke eşlär ministrlığı Ğiraq suğışı barğanda ildän ber Ğiraq qaçağı da quılmayaçaq, digän belderü yasadı.2002nçe yılnıñ azağında Germaniädä 83 meñ Ğiraq immigrantı bar dip isäplänä ide. Germaniädä säyäsi sıyınu xoquqı sorawçı Ğiraq möxacirläre 14%nı täşkil itä. Şulay uq, Brussel summitı axırında Tönyaq Koreanıñ atom töş programması tiräsendäge wazğiätne tikşerer öçen Yevropa Berlegeneñ tışqı eşlär ministrları, şulay uq Könyaq Korea häm Yaponiä wäkillären cıyılırğa çaqıru yañğradı.
XS
SM
MD
LG