NATOnıñ 19 äğza däwlät wäkilläre bügen Ğiraq suğışı barışı turında fiker alışır öçen cıyıldı. Alyansnıñ berniçä äğzase Törkiäne Tönyaq Ğiraqqa ğaskärlären kertmäskä çaqırdı. Atna azağında Germaniä häm Belgiä Törkiä xärbi köçlären Ğiraqqa kerüenä qarşı çıqtı. Amerika Quşma Ştatları da Törkiäne bu adımnan tıyılırğa çaqırdı, törek ğaskärläreneñ Tönyaq Ğiraqqa kerüe-töbäktäge totrıqsızlıqnı arttıraçaq, dide Amerikan wäkile. Läkin kiçä premyer-ministr Recep Tayyip Erdoğan, kiresençä, wazğiätne totrıqlı qaldırır öçen häm qaçaqlar ağımın tuqtatır öçen Törkiä ğaskärlären tönyaq Ğiraqqa kertü ixtimalı bar, dip beldergän ide. Bügen Törkiä citäkçelege belän Quşma Ştatlarnıñ maxsus wäkile Zalmay Khalilzad oçraşa. Associated Press agentlığı xäbärlärenä qarağanda xökümät başlığı Erdoğan ğaskärlärne Ğiraqqa kertü mäs’äläsendä ilneñ xärbi citäkçese general Hilmi Özkök belän söyläşkän inde. Özkök çik buyı töbägenä barıp irtägä häm çärşämbe könne wazğiät belän tanışaçaq.
