Accessibility links

якшәмбе, 22 октябрь 2017, Казан вакыты 11:27

Tatar tele uqıtuçıları bäygese äzerlänä


Küptän tügel Sverdlov ölkäse mäğärif üsterü institutı metodistı Zäytünä xanım Şäymöxämmätowa ölkädäge tatar awılları buylap yaña uqu yılında ana tele uqıtunıñ torışın tikşerep qayttı. Mäğlüm bulğança, soñğı yıllarda Rusiä mäğärif sistemasında küp kenä dokumentlar qabul itelde. Mäğärif sistemasın kamilläşterü, modernizatsiälänügä yunältelgän älege dokumentlar arasında uylanırğa mäcbür itüçeläre dä bar. Zäytünä xanım fikerençä, ana telen uqıtunı federal' uqu planınnan alıp, regional' uqu planına kertü näticäsendä töbäklärdä ana tele uqıtu awırraq baraçaq. Şuña qaramastan, yaña uqu yılında Sverdlov ölkäsendä tatar telen uqıtuçı mäktäplär sanı kimemägän. Barı tik uqıtu säğätläre genä küp bulsa ike-öç säğätkä qalğan. Zäytünä xanım fikerençä, säğätlär sanı az bulğanda uqu eçtälegen uquçılarğa tulısınça citkerü öçen uqıtuçı variativ programmalar buyınça eşlärgä, uquçılarnıñ üzençäleklären isäpkä alıp, üz avtorlıq programmasın уaklarğa tieş. Bu eştä Sverdlov ölkä mäğärif üsterü institutı uqıtuçılarğa häryäklar yärdämgä kilergä äzer tora. İnstitut programmasında oktäber ayı axırında tatar tele häm ädäbiät uqıtuçıları bäygese uzdıru qaralğan. Älege bäyge berniçä maqsatnı küz aldında tota: berençedän, tatar tele fäneneñ aktual'legen, kiräklegen isbat itü, ikençedän, açıq däreslär waqıtında üzara täcribä urtaqlaşıp, pedagogik ezlänülär alıp baru, urtaq eş plannarı qorıp, alarnı eşkärtep, variativ programmalar buldıru. Monnan tış, tatar tele uqıtuçıların qızıqsındıru da zur urınnı alıp toraçaq. Bäyge ütkärü öçen Ärtä rayonınıñ Äceğol urta mäktäben sayladılar. Bu mäktäpkä tuqtalunıñ da sere bar. Ütkän yıl Äceğol urta mäktäbenä yöz yıl tulğan ide. Şul däwerdä tatar tele uqıtılmağan ber genä yıl da bulmağan. Bu yağı belän Äceğol mäktäbe Rusiädäge başqa mäktäplärdän ayırılıp toradır. Äceğol balaları tatar tele fänen üzläşterü buyınça iñ aldınğı urında toralar – yıl sayın ölkä külämendä uzdırıla torğan olimpiadalarda alarnıñ prizlı urınnarnı ğına alıp kilüe şuña ber misal. Annan soñ, uqıtuçılar kollektivı konkursta qatnaşuçılarnı üzlärendä qabul itärgä bik quanıp riza buldı. Şulay itep, ölkä külämendä berençe märtäbä uzdırılaçaq bu konkursnı uzdıru öçen Äceğol urta mäktäbendä uñay şartlarnıñ barısı da tudırıldı. Konkursta qatnaşırğa bügenge köndä unbişläp uqıtuçı teläk belderde. Ğarizalar qabul itü äle dä däwam itä. Bu zur waqiğanı matdi yaqtan tä'min itü eşenä Milli Media-Xolding xezmätkärläre dä aktiv quşıldı. Sverdlov ölkäse külämendä berençe tapqır uzdırılaçaq tatar tele uqıtuçıları konkursı milli mäğärifne saqlap qalu, anı üsterü eşendä yaña ber basqıç bulır dip ışanası kilä.

Fäwiä Safiullina, Yekaterinburg.

XS
SM
MD
LG