Üzäk saylaw komissiäsenä köndä yaña mäğlümatlar kilep tora. Düşämbe, 29nçı sintäberdä dä şulay buldı. Ber 15läp firqä üzeneñ saylawlarda qatnaşuı xaqında belderde häm üzäk saylaw komissiäsenä isemleklären cibärde. «Berdäm Rusiä» firqäse isemlegendä ällä ni yañalıq yuq. Regional’ isemlektä 9 keşe häm tağın 5se ber mandatlı okruglarda bara. Aldan iğlan itelgänçä, regional’ isemlekneñ başında Färit Möxämmätşin tora. İkençe urında - Oleg Morozov. Annan soñ Yuriy Näcmiev häm başqa Tatarstan keşeläreneñ isemnären kürep bula. Duma deputatı Mixail Rakitskiy bu yulı isemlektä 7 urınnı bili. Läkin belgeçlär isäpläwençä, ere, qüätle «Berdäm Rusiä» firqäse küpçelek tawışnı cıya alğan oçraqta da, Dumada respublikadan barı tik 3 keşegä genä urın birelergä mömkin. Firqä täcribäle deputat Oleg Morozov öçen uñay şartlar tudırğan, dip äytep bula. Çallı okrugında ütmägän oçraqta da, ul firqä isemlege nigezendä dä Duma deputatı bula ala. Ber Qazan gäzite xäbär itkänçä, Oleg äfändegä Çallıda Mäskäw tatarlarınnan Fail İbätov häm «Tormış» firqäse wäkile Bulat Yanbarisov belän köräşergä turı kiläçäk. Şunıñ östäwenä, kommunistlar firqäse Xafiz Mirğalimov da şuşında uq köräşergä cıyınuı xaqında iğlan itte. Xäbärçebez Rimzil Wäli äytkänçä, deputat Salimxan Axmätxanov «Xalıq firqä»seneñ regional’ isemlegendä 1nçe bulıp bara. Ul äle Älmät saylaw okrugında da deputat kenägäse öçen köräşergä uylıy. Anıñ firqädäşläre Flürä Zıyatdinova Tübän Kama saylawçılarınıñ küñelen yawlarğa tırışaçaq, ä Sergey Şaşurin İdel buyı okrugında saylaw aldı yarışına çığarğa uylıy. Şunısı qızıq, 99nçı yılğı saylawlarda xakimiät firqäse wäkile itep Dumağa barğan Flürä Zıyatdinova, xakimiätlärne ayawsız tänqitlägän Sergey Şaşurin belän niçek itep ber firqädä tora ala, añlaşılmıy. Annan soñ bu ike şäxesneñ berse dä firqäneñ regional isemlegenä kermägän, şuña 1 mandatlı okrugtağı saylawlar alar öçen Dumağa elägü öçen berdänber yul bulıp qala.
Flürä xanımğa Tübän Kama okrugında «Berdäm Rusiä», kommunistlar firqäse, «SPS» uñ köçlär berlege häm başqa säyäsi köçlär belän yarışırğa turı kiläçäk.
Bank citäkçese häm elekke finans ministrı Rinat Ğöbäydullin Mäskäw okrugı saylawçılarınıñ tawışların cıyarğa ömetlänä. Anıñ belän bergä şul uq okrugta kommunistlardan Näsimä Stolyarova häm «SPS» firqäsennän Aleksandr Fomuşkin saylanırğa teli. Tapşırunı äzerlägändä kilgän yaña mäğlümatlarğa qarağanda «Tormış firqäse» Mäskäw saylaw okrugında qatnaşu öçen yazuçı Rinat Möxämmädievnı täqdim itkän. Dimäk, Qazan häm respublikanıñ Yaşel üzän, Apas, Çüpräle rayonnarı saylawçıları 2 xakimiät firqäse häm uñnar belän sullar arasında saylarğa tieş bula.Ğomum alğanda «Tormış firqäse» dä äle düşämbe könne genä üz isemlegen Rusiäneñ Üzäk saylaw komissiäsenä tapşırdı. Anda federal isemlektä 11nçe urında Räfqät Altınbayevnı kürep bula. Regional’ isemlekneñ başında Nursinä Abdraşitova torğan bulsa, başqa Tatarstanlılarğa 4nçe, 6nçıdan 10nçığa qädär urınnar birelgän.
«Rodina» digän xalıq-patriotik köçlär blogı da üz isemlegen täqdim itte. Anda regional’ isemlekneñ başında deputat Fändäs Safiullin torsa, annan soñ studentlar xäräkäte citäkçese Eduard Jijimovnıñ iseme bara. Fändäs Safiulinnıñ Älmät saylaw okrugında da köç sınap qararğa isäbe bar. Añı anda «Berdäm Rusiä» firqäse wäkile Marat Mäğdiev, «Xalıq partiäse»nnän Salimxan Axmätxanov kebek nämzätlär belän yarış kötä.Kön sayın saylaw aldı isemleklärenä yaña mäğlümatlar östälep tora. Möhim üzgäreşlär xaqında bez dä şundıy uq tizlek belän, tıñlawçılarğa xäbär itep torırbız.
Bikä Timerova.
