Accessibility links

Кайнар хәбәр

Yaña açış: mäğlümat qırı vertikale


Sember ölkäse Qanunnar çığaru cıyılışı, nihayät, ber ayğa soñğa qalıp bulsa da, kiläse yılğa ölkä qaznası proektın qarawğa kereşte. Proekt 300 mln defitsit belän tözelgän. Deputatlar Ölkä xaqimiäteneñ rezerv (maya) fondına küp aqça qaralğanı belän qanäğät tügel: ağımdağı yılnıqınnan ike märtäbä artıq – 80mln. sorala. Häm bu fondnıñ qullanışı da rizasızlıq tudıra. Äytik, 104-Hawa-desant brigatınıñ, Qarabax suğışı tuqtatılğaç, Äzerbaycannan çığırılıp, Semberdä urnaşuına 10 yıl tulu uñayınnan uzdırılğan tantanağa aqça tügüneñ mäğnäsen añlamıylar cirle deputatlar.

Ölkä xakimiäte qararı buyınça, Ölkäneñ Matbuğat idaräse beterelde här rayonnar gäzitläre yuridik şäxes statusınnan mäxrüm iteldelär. Alar urınına Ölkä xakimiäte qaramağında Mäğlümäti säyäsät departamentı häm gäzitlärneñ berläşterelgän redaksiäse tudı. Ölkä başlığı Vladimir Şamanov monı byudjet aqçasın döres qullanu (optimal'läşterü) häm “mäğlümat qırı vertikalen tözü kiräk”, dip añlattı. Şamanovtan ber özek ğibrätle yañğırıy: “Räsmi mäğlümät çaralarında eşläwçe jurnalistlarnıñ süz irege küpkä tübänräk. Çönki ul xaqimyäit xoquqına iä bulğan (“obleçennıy vlast'yu”) keşeneñ qaraşın çağıldıra. Häm ul yöklänelgän taläplärgä cawap birergä tieş.”

Ğammäwi mäğlümat çaraları turındağı Qanunğa qarşı kilüçe mondıy qararnıñ berençe qarlığaçları ozaq köttermäde dä. Rayon gäzitlärendä saylaw aldı reklamalarına buşlay urın sorawçılarnıñ ğozerlären qabul itmilär. Çınlı rayonı başlığı Xanäfi Ramazanov Däwlät Dumasına kandidat bulıp terkälgän. Üz rayonınıñ gäzite “Sil'ninskiy vestnik”nıñ redaktorı – Ramazanovnıñ ğarizasına “tüläwle reklamalar ğına bastırabız”, dip yazğan. Bälki moña Ramazanov belän Şamanov arasındağı mönäsäbätlärneñ cılı bulmawı da tä'sir itkänder. Şunısı ğayre tabiği xäl: rayon başlığı üz rayonında çığuçı rayon gäzite östennän rayon häm ölkä prokuraturalarına şiqayät yazğan. Xäyer, monısı da ğacäp tügel: Däwlät Dumasına omtıluçı, өlkä Qanunnar çığaru Cıyılışı räise urınbasarı Tat'yana Sergeyeva aldında da törle kirtälär qorıla.

Saylaw aldı kampaniäse şulay başlanıp kitte.

Ayrat İbrahim
XS
SM
MD
LG