22 dekaber könne İstanbulda Tatarstan yoldızları dip isemlängän konsert uzdı. Älege zur mädäni çara şähärneñ Zur konsertlar zalında ütte, dip xäbär itte bezgä anda yäşäwçe millättäşebez Ruşan Biçuri. Konsertta cırçı Zilä Sönğätullina, skripkaçı Marat Äxmätov, pianistka Margarita Koval’skya çığış yasağannar. Tatarstan sänğät ostaları Röstäm Yaxin, Salix Säydäşev, Sara Sadıkova häm başqa kürenekle tatar kompozitorlarınıñ äsärlärennän tözelgän programma täqdim ittelär. Tamaşaçılarğa, şulay uq, uynalğan äsärlär turında Marat Äxmätov qısqa ğına mäğlümat tä birep, alarnı icat itü tarixı belän dä tanıştırıp barğan. Tatarstan artistlarınıñ çığışları konsertqa kilüçelärgä şundıy oşağan ki, säğät yarımnan artıq barğan programmadan soñ da tamaşaçılarğa tağın berniçä östämä äsär dä uynalğan. Şunısı ğına ayanıç, tatar klassik muzıkası belän oçraşuğa berniçä distä keşe genä kilgän. Alar arasında İstanbulda yäşäwçe millättäşlärebez, Tatarstannan kilgän studentlar, tatar mädäniäte belän qızıqsınuçı töreklär bulğan. Monı reklama citmäw belän dä añlatıp buldır. Şunısı qızıq, elek konsertlar belän kilgän tatar artistları kübräk xalıq cırların cırlıylar ide dä, tatar biülären täqdim itälär ide, di Ruşan Biçuri. Anısı da bik äybät, älbättä, läkin tatar xalqınıñ professional’ muzıkası belän dä tanıştıru bik möhim. Ruşan Biçuri süzlärenä qarağanda, tamaşaçığa älege konsert bik oşağan. Şuşındıy kiçälär kübräk bulsın ide, digän teläktä qalğan İstanbuldağı millättäşlärebez.
Gölnaz İlgizär
