Tatarstan respublikasınıñ säwdä häm tışqı elemtälär ministrı Xafiz Salixov citäkçelegendäge räsmi delegatsiä bu könnärdä Bangladeşta buldı. Anda tatarstanlılar KamAZ maşinaların, respublikanıñ neft eşkärtü produktsiäsen täqdim ittelär. Respublika Däwlät Şurasınıñ Prezidiumı utırışında älege parlamentnıñ soñğı utırışın – 21 sessiäneñ däwamın 26 fevral könne ütkärergä qarar ittelär. Anda deputatlar 67 mäs’älä qararğa tieş bulaçaqlar. Kön tärtibendäge şulay uq Däwlät Şurası räise Färit Möxämmätşinnıñ parlamentnıñ 4 yıllıq eşçänlegenä bağışlanğan çığış ta qaralğan.
Qazanda 21 fevral – Xalıqara tuğan tele uñayınnan ütkärelä torğan atnalıq däwam itä. Anıñ qısalarında comğa könne Qazan däwlät pedagogiä universitetında Tatarstanda tellärneñ qullanılışı häm üseş mömkinlekläre dip isemlängän fänni-ğämäli konferensiä uzdı. Anı pedagogiä universitetı, Ministrlar kabinetınıñ respublika xalıqları tellären üsterü bülege häm Bötendönya tatar kongressı oyıştırdı. Anda cıyılğan ğalimnär, xakimiät, cämäğätçelek wäkilläre tellär turındağı qanunnarnı ğämälgä aşıru mäs’älälären, global’läşü şartlarında tel säyäsäten, respublikanıñ yuğarı uqu yortlarında tellärne uqıtu problemaların tikşerde. Konferensiädä Tatarstannıñ Mäğärif ministrı urınbasarı Lyudmila Noğmanova Tuğan tel – millät häm mäktäpneñ nigeze digän çığış yasadı. Ä Bötendönya tatar kongressı räise urınbasarı İlsur Hadiullin isä, Tatarstan xalıqları telläre turındağı qanunnı ğämälgä aşıru yünäleşendä tatar kongressınıñ eşçänlege belän tanıştırdı. Cıyılışta qatnaşuçılar Qazan şähärendä dä tellärne saqlaw häm üsterü mäs’äläläre belän tanışa aldılar. Bu xaqta şähär xakimiäteneñ milli eşlär bülege başlığı İrek Arslanov söyläde.
Xäyer, Ana köne uñayınnan Qazanda tatar telenä bäyle çaralar ğına ütkärelmi. Ana tele atnalığı qısalarında başqa tellärgä dä zur iğtibar birelä. Mäsälän, pänceşämbe irtäsendä Yaña ğasır radiosı dulqınnarında jurnalist Veronika Azimovanıñ Tatarstanda rus teleneñ torışına bağışlanğan programması efirğa çıqtı. Anıñ äñgämädäşe - Tatarstannıñ Mäğärif ministrı urınbasarı Lyudmila Noğmanova respublika mäktäplärendä rus teleneñ dä tatar telennän äzräk uqıtılmawı xaqında söyläde, bezneñ balalarnıñ rus tele buyınça olimpiadalarda Mäskäw häm Peterburg uquçıların da uzdırıp, berençe urınnarnı yawlawları turında äytte. Comğa könne isä Qazanda törle millättän bulğan uquçılar arasında ana telen belü buyınça bäyge uzdı. Anda 12 teldä şiğerlär uqıldı, cırlar cırlandı, tel belü buyınça konkurslar ütte.
Gölnaz İlgizär
