Accessibility links

Кайнар хәбәр

Udmurtiäneñ Kambarka rayonında üzençälekle bäyräm — töpçeklär köne — bıyıl uñışlı uzmadı


Udmurtiäneñ ber Kambarka rayonın başqalardan Qama yılğası ayırıp tora. Älege rayon Başqortstan häm Tatarstannıñ Aqtanış rayonı belän çiktäş buluı säbäple bu yaqlarğa tatar häm başqort millätläre wäkilläreneñ dä bu yaqlarğa küçep kilüçeläre bik küp. Zur yılğa keşelärgä tuqlanırğa mömkinlek birgän, urman eşkärtü kombinatları eş urını belän tä'min itkän. Rayon üzäge Kambarkada bigräk tä Qama häm Şol'ya poseloklarında meñläp tatarlar isäplänä.

Ütkän yäkşämbedä Qama poseloğınıñ mädäniät yortında bu rayonda ğına uzdırıla torğan çara — Töpçeklär köne bilgelänep ütelde.

Bügenge finans qıyınlıqlar awıllarda kübräk sizelä — mädäniät yortı suıq, zalğa cıyılğan xalıq tunnardan utırırğa mäcbür buldı. Millättäşlärebez İjawdan kilgän qunaqlarnı — bigräk tä İjaw şähäreneñ Cämiğ mäçete comğa imamı Fäiz xäzrät Mäxämmätşinnnı zur iğtibar belän tıñladılar. Ul üzeneñ çığışında dini qanunnarğa häm yolalarıbızğa nigezlänep balalarnı zur sabırlıq belän tärbiälärgä öndäde, şul waqıtta ğına ata-ana üzenä xörmät qazana dip basım yasadı. Fäiz xäzrätkä dini qanunnar buyınça bik küp sorawlar da birdelär — alar bala tuğaç uqıla torğan doğalardan alıp, mäyetne ozatu tärtibe kebek yolalarğa qağıldı.

Udmurtiä tatar ictimaği üzäge citäkçese Fnün Mirzayanov üzäkneñ başqarğan eşläre belän tanıştırdı, plannarı turında söyläde. Aktiv millättäşlärebez — tatar üzäge räise Tälğät Säläxov häm Mirdälif Yaqupovqa milli säyäsät ministrlığınıñ räxmät xatların tapşırdı.

Tälğät Säläxov ağımdağı yılğa bilgelängän eş planı belän tanıştırdı. Ul qaralğan çaralarnıñ küp öleşe balalar arasında eşne aktivlaştıruğa yünältelgän dip basım yasadı. Bıyıl rayon administratsiä byudjetında milli oyışmalar belän eşläw öçen 23 meñ sum aqça qaralawın, ä rayonda dürt räsmi terkälgän oyışma buluın isäplägändä, tatar üzägenä biş meñ sum aqça bülenäçägen, häm qayçan, nindi çaralar uzdırıluı häm küpme çığım talap itäçägen añlattı.

Annan soñ säxnädän balalar baqçasınıñ tatar fakul'tativında tuğan telen öyränüçe nänilär dönyada iñ yaqın, iñ matur keşe äni dip şiğerlär söyläp, ber biyu başqarğaç, tağın berniçä keşe çığış yasadı, mäçetlärdä islam dine nigezlären öyränüçe balalar Qor'än uqıdı häm islam qanunnarına bağışlanğan viktorinada qatnaştı. Ciñüçelär arasında İjawdan kilgän balalar Zölfiä Şağieva, Ali Batıyev häm Qama posulığınnan El'vira Yaqupova. Sorawlar ciñel tügel ide, didelär balalar bäygedän soñ çäy tabınına cıyılğaç.

Älege çarağa kilgän ölkännär İjaw qunaqları belän oçraşudan qänäğät, ämma bu çaranı Töpçeklär köne dip äytep bulmıy dip taralıştı. Alarnıñ üzlärenä süz.

Audio

Dörestän dä, här çaranı sıyfatlı häm keşe küñelendä yaqtı ez qaldırırlıq itep uzdıru zur äzerlek talap itä. Monda ata—anasın yaxşı tärbiälägän berniçä keşe, ädäple, yaxşı balalar üstergän ğailälär bilgelänsä, alarğa istälekkä keçkenä genä büläklär birelsä, cırlar başqarılsa, ul waqıtta kütärenke ruxta taralır ide xalıq, dip assızıqladı Fäiz xezrät Möxämmätşin, Udmurtiä tatar ictimaği üzäge citäkçese Fnün Mirzayanov.

Audio

Şul waqıtta ğına aktivistlarğa qarata xörmät tä artır, alarğa eşlärendä yärdäm itüçelär dä küp bulır ide.

Xämidä Ğäyfullina, «Azatlıq» radiosı, Udmurtiä.

XS
SM
MD
LG