Watanım Tatarstan gäcite üzeneñ 25 fevral sanında uquçılarnı respublikanıñ Saba rayonında ütkän kiñäşmä belän tanıştıra. Awıl xucalığın üsterügä bağışlanğan bu cıyılışta älege tarmaqnıñ Tatarstan öçen östenlekle tarmaq buluı häm anı tağın da näticäleräk eşlätü öçen yaña texnologiälär qullanu kiräklege äytelde. Şunda uq rayonnıñ Olı Kibäçe awılınıñ yañarışı turında Lyutsiä Farşatovanıñ da yazması urnaştırılğan. Monnan tış, gäcit soñğı yıllarda kön üzägendä torğan narkomaniä problemasına möräcäğät itä. Narkomafiä häm şäxes itege digän mäqäläsendä Räşit Fätxraxmanov narkomaniä çire belän integüçelärne alarnıñ ixtıyarlarına qarşı däwalaw, keşe xoquqların bozu bulamı digän sorawğa cawap ezli. Narkomannarnıñ xoquqların yaqlaw näticäsendä Rusiädä mäktäptä uquçı üsmerlärneñ 4 millionı narkotik qullana, şularnıñ ber millionı inde narkotik matdälärgä bäyle, dip yaza ul. Şähri Qazannıñ çärşämbe sanı küptän tügel genä uzğan Watannı saqlawçılar köne uñayınnan berniçä yazma urnaştırğan. Alardan Qazanda ütkän bäyräm çaralı, armiä saflarında xezmät itü istälekläre belän tanışıp bula. Şulay uq gäcittä kriminal temağa yazmalar da urın alğan. Prokuratura xezmätkärläre häm jurnalistlar soñğı yıllarnıñ qanlı cinayätläre belän tanıştıra. Älege temalar qızıqsındırmasa, Tuğan yağım – ğäziz cirem rubrikasında basılğan yazmalarnı uqıp qararğa bula. Anda respublikanıñ törle rayonnarındağı awıl xucalığı xezmätkärläreneñ aldınğıları xaqında bäyän itelä. Ä menä kiläse atnağa üzläreneñ yazmışın belergä teläwçelär Şähri Qazanda basılğan yoldıznämä belän tanışa ala. Älege gäcitne uquçılar arasında yoldızlar yurawına qarap eş it.çelär az tügel axırı – yoldıznämä gäcitneñ berençe bitendä ük bastırılğan. Veçernyaya Kazan gäciteneñ çärşämbe sanında – älege basmada siräk kütärelä torğan tatar cırı, tatar estradasınıñ torışı temasına yazma urın alğan. Jurnalist Alsu Musina bu xaqta tatar cırçıların yazdıruçı studiä citäkçese Ayrat Volkov belän söyläşä.
Gölnaz İlgizär
