Berençe byulletendä — Rossiä Federatsiäse başlığınıñ kem buluın xäl itäçäk, ikençesendä — respublika citäkçesen bilgeläyäçäk. Udmurtiä prezidentı bulu öçen altı keşe uzara sınaşa. Alar arasında bügenge respublika citäkçese, ike vraç, Udmurtiädä tuıp üskän, ä bügen Soçi häm Mäskäwdä yäşäwçe ike keşe, ikese dä udmurt milläte wäkilläre, Qazannan eşsez yurist. Soñğı atnalarda saylawçılarnı üz yağına cälep itü öçen prezidentlıykka kandidatlar respublika buyınça törle çaralar oyıştıra. Ayırım millät wäkilläre belän dä oçraşular bulıp uzdı. Eşneñ ber alımı — konsertlar oyıştıru. Udmurt millätennän wäkillär üz qardäşläre belän oçraşa, şulay uq kandidatlar tatarlar arasında da eşne bik aktiv alıp bara. Bu forsattan faydalanıp, cirle tatar üzeşçän sänğät ostaları da respublikanıñ xättä keçkenä genä awıllarına da barıp citte. Ütkän atnada kandidatlarnıñ finans yärdäme näticäsendä Glazov, Balezino töbägendä yäşäwçe millättäşlärebez küñellä oçraşularda qatnaştı. İjawda ğömer itüçe tatarlar Tatarstan Respublikası başqalasınnan kilgän «Qazan» biyu ansamble kollektivı konsertında räxätlänep yal itte. Döres, biletlarnıñ ber öleşen xalıq bilet kassalarınnan üzläre satıp alğan, tamaşaçınıñ ikençe yartısı kandidat fondınnan birelgän aqçağa mädäniät sarayına kilüe açıqlandı. Bu biyu kollektivınıñ citäkçese, üze dä bik osta biyuçe Çulpan Zakirova äytüençä, alar İjawda berençe tapqır. Ämmä tamaşaçı fikerençä, mondıy matur iyüllerne, osta başqaruçılarnı tağın qararğa äzer. Tatar tamaşaçısın başqa tanılğan säxnä ostaları da söyenderde.
Ä menä kandidatlarnıñ tağın berse Yuri Odiankov üzen saylatır öçen balalar öçen tösle buyaular belän buyarğa räsem kitapçığı äzerlägän. Anıñ eçtälege berençe çiratta — bügen respubliqa täxetendä utıruçınıñ familiäse Volkovka bäyle. Ul ğam'sez äkiät geroe — büre räweşendä surätlängän. Şuşı uq kandidat tatar telendä tatarlarnıñ problemalarına basım yasap, häm, prezident bulıp saylanğan oçraqta, alarnı çişärgä wäğdä itep, listovka tarattı.
Aleksandr Volkov tatar cämäğätçelege belän oçraşu uzdırdı. Anıñ tarixı mondıy. Ütkän yılda tatar oyışmaları wäkilläre prezident belän oçraşu uzdırunı sorağaç, anı barlıq milli oyışmalar citäkçeläre belän tügäräk östäl söyläşüe oçraşuı itep uzdırğannar ide. Ul waqıtta tatar oyışmaları citäkçeläre äzerlänep kilep, respublikada yäşäwçe tatarlarnıñ telen saqlap qalu, mädäniäten üsterü buyınça ireşelgän uñışlarnı bilgeläp, kiläçäkne küzallap, üzläreneñ zar—moñnarın beldergän ide. Ämmä oçraşudan soñ uzğan yıl däwerendä eştä üzgäreşlär sizelmäde.
Tatar gimnaziäsenä yanqorma tözü mäs’äläse başqa urınnarda tikşerelmäde, bügen gimnaziägä 180 baladan artıq qabul itä almıylar, alarnı utırtırğa urın yuq, ä anda uqırğa teläk belderüçelär sanı baytaq. Tatar professional' cır—biyu ansamble buldıru — şulay uq xäl itelmäde. Tatar kollektivların üz qanatı astına alğan «Spartak» icat yortında da sänğät yortına xas bulğan zäwıqlıq belän maqtanırlıq berni dä yuq — kiresençä, ul cimerek xäldä .
Mäskäwdän kilgän boyırıq näticäsendä tatar milli çaralarınıñ xäle dä bik möşkel buluı ixtimal — tatar tapşırularınıñ waqıtı qısqara, efir waqıtı äledän äle üzgärtelep tora. Tatar basmasına qısqartu belän yanap toralar.
Tatar ziratınıñ xäle dä, yaña mäçet tözeleşläre dä ölkännärne borçıy. Bu häm başqa mäs’älälärne respublikanıñ useş programmasına kertü turında süz bardı oçraşuda häm alar prezidentlıkka kandidat Volkovqa nakaz bularaq ta tapşırıldı. Respublika Prezidentına kandidat Volkov belän oçraşudan soñ törle uylar da tudı dip yazıp çıqtı tatar basması «Yañarış» gazetası. «…Qayseber waqıtta bez üzebez dä sorawnı da quya belmibez, burıçlarnıñ möhimen dä bilgeli almıybız. … ul tatarnıñ ber—bersen xörmät itep kümäk eşli ala—almawına bäyle …», dip yaza avtor gazetada.
Dörestän dä, saylawlarğa xalıq künde inde — ul keşeneñ tuqlanu öçen kibetkä kerep ikmäk alğanı sıman, yäki küñel açu öçen tamaşağa yörüe kebek — nindider ber ğädätkä öyerelde. Ul ütär dä kitär. Prezidentnıñ kem buluına qaramastan — tatarlarğa bergäläşep berençe burıçnı bilgeläw — bu mäs'älä kön tärtibe bulıp qala. Bu mäs'älä Udmurtiä tatar ictimaği üzägeneñ 20 martına bilgelängän qorıltayında xäl itelerme — äytüe qıyın. Tatar oyışmaları küp, alarnıñ citäkçeläre redaksiägä şaltırıtap, bez dä Udmurtiädä yäşäwçe tatarlar, ul cıyında qatnaşıp, üz fikerlärebezne belderergä, qararlar qabul itärgä xoquqlı dip belderä. Waqıt kürsäter.
Xämidä Ğayfullina, «Azatlıq» radiosı, Udmurtiä.
