İctimaği tormışta iñ zur yañalıq – Tatarstan konstitutsiäse tiräsendäge xällär. Belgänegezçä, Tatarstan Yuğarı mäxkämäse, respublika suverenitetqa iä tügel, digän qarar çığarğan ide. Bu xaqta tapşırularıbızda söylägän bar. Tatar ictimaği üzäge bu mäs’älägä mönäsäbäten belderde häm aprilneñ ikençe yartısında qarşılıq çarasın ütkärergä ciena. Sişämbe könne «Azatlıq» radiosınıñ Qazan studiäsendä qunaqta Räşit Yäğfärov buldı häm ul ictimaği üzäkneñ plannarı turında söyläde. Matbuğatta, Tatar ictimaği üzäge ğädättän tış qorıltay, syezd ütkärergä ciena digän xäbärlär kürende, döresme bu? Tatar ictimaği üzäge räise bu sorawğa : «Qorıltay ütkärü planda yuq. Qayber dairälärdä andıy süzlär işetelsä dä. Xäzer Tatarstan yuğarı mäxkämäseneñ qararına qarata miting ütkärergä cienabız.»,- dip cawap birde.
Mitingnı ütkärü eşendä Tatar ictimaği üzägeneñ başqa qanatları da qatnaşa. «Azatlıq» radiosına qaçaqlar fondı citäkçese Yunıs Qamaltdinov şaltırattı. Ul şuşı mitingnı ütkärüçe oyıştıru komitetı başlığı eşen alınuın xäbär itte.
Bikä Timerova
