Bıyılğı 26 aprel' qoyaşlı häm salqınça kilde. Här yılnı bu könne Qazan üzägendä millät, şiğriät ruxı belän yanuçı meñnärçä keşelär cıyıla. Tatar xalqınıñ böyek şağire Ğabdulla Tuqaynıñ tuğan könendä ütkärelgän şiğri mitingta Tatarstan respublikasınıñ Tuqay isemendäge bülägenä layıq buluçılar täqdim itelä. İñ yalqınlı fikerlär, şiğri açışlar şunda yañğıratıla. Bıyılğı şiğriät bäyräme ğädättägeçä Cälil teatrı yanındağı tıqrıqta tügel, ä Ğäliäskär Kamal teatrı qarşındağı mäydanda ütte. Kön salqınça buluğa da qaramastan, mäydanğa bik küp xalıq kilgän ide. Şiğri mitingnı Tatarstan Yazuçılar berlege räise Foat Ğalimullin açtı. Yaz, Tuqay, millät turında söylägännän soñ, ul Ğabdulla Tuqay bülägeneñ yaña lawreatı Mirğazıyan Yunısnıñ awırıp toru häm Qazannan yıraqta buluı säbäple, bu bäyrämgä kilä almawın äytte.
Bıyılğı Tuqaynıñ tuğan köne häm şiğriät bäyräme bik üzençälekle. Çönki bu kön berençe tapqır räsmi räweştä Tuğan tel köne bularaq ütkärelä. Tatarstannıñ xökümäte isemennän iğlan itelgän täbrik süzendä menä şundıy yullar bar. Här xalıqnıñ qabatlanmas üzençälege, aña ğına xas sıyfatları, näq menä tuğan tel yärdäme belän ğasırlar çoñğılınnan bügenge küngä qädär kilep citkän... Bez respublikabıznıñ tatar telen üsterü buyınça fänni häm metodik üzäk buluı belän ğorurlanabız. Bu üz çiratında Tatarstannıñ Rusiä töbäkläre häm çit illär belän xezmättäşlegen kiñäytügä yärdäm itä. Här keşe, teläse qaysı millät wäkile üzen irken totsın, irken xis itsen, üzeneñ tuğan telen işetsen häm ana telendä söyläşsen öçen baytaq eşlär başqarası bar.
Bu könne şähärlärdä, awıllarda oçraşular, mitinglar, ädäbi-sänğat çaraları, tuğan tel däresläre ütkärelde. Qazanda kiçke säğät dürttä Qamal teatrı yanındağı şul uq mäydanda tuğan tel bäyräme başlanıp kitte. Bik küp mäşhür cırçılar, süz ostaları qatnaşqan bu bäyräm kiçkä qädär däwam itte.
Rimzil Wäli
