Küptän tügel Yekaterinburg şähäre çitendä urnaşqan “Şirokaya reçka” dip atalğan bistädä tacik xalqına qarşı miting bulıp uzdı. Mitingta meñnän artıq keşe qatnaştı. Bu eşneñ başlanğıçında “Narkotiklarsız şähär” dip atalğan fond citäkçeläre tordı.
Älege fond eşçänlege turında bik küp söylärgä bula. Çınlap ta, fond küp kenä afät taratuçılarnı cäzağa tarttırdı, bik küp yäşlärne turı ülemnän alıp qaldı. Ämma qaywaqıtta alarnıñ eşçänlege artıq aktivlaşıp kitä kebek.
Fond citäkçeläreneñ eşçänlegendä säyäsi yäisä başqa törle qızıqsınuçanlıqlarnıñ buluı ğäcäp tügel. Älege xäräkätneñ elekkege citäkçese Yevgeniy äfände Royzman şulqädär zur populyarlıq qazandı ki, dekaber ayında Däwlät duması deputatı bulıp saylandı. Anıñ Tacikstan belän Rusiä arasında viza rejimı kertü öçen köräş başlağanın küplär işetkänder. Aq ülem kitergän narkotik afäten taratuda başlıça taciklarnı ğına ğäyepläp, Yevgeniy Royzman tuğan şähäre Yekaterinburgta taciklarğa qarşı ayusız köräş başladı. Anıñ ciñel qulı belän oyıştırılğan mitingta bu xalıqqa qarata turıdan-turı yanawlar yañğıradı. Qızıp kitkän oratorlarnıñ çığışında açıqtan-açıq millätara doşmanlıq qabızırğa etärüçe süzlär yañğıradı.
Kemnärneñder säyäsi populyarlıq yawlap alu maqsatı belän eşlängän bu eşe aldınğı cämäğätçelekne bik zur borçuğa töşerde. Küptän tügel Yekaterinburg şähäreneñ Tınıçlıq häm Duslıq yortında törle milli oyışmalar citäkçeläre çirattan tış utırışqa cıyılıp, açıqtan-açıq millätara doşmanlıqnı quzğatuçı mondıy xällärgä kisken räweştä rizasızlıq belderdelär.
Cinayätneñ milläte dä, dine dä yuq. Ayırım cinayätçelär öçen böten ber xalıq cawap birä almıy. Milli oyışmalar citäkçeläre bertawıştan Sverdlov ölkäse xökümäte isemenä mondıy tärtipsezleklärne buldırmawnı taläp itep möräcäğät qabul ittelär. Xökümät räise Aleksey Vorob'yev şul uq könne massaküläm mäğlümat çaraları arqılı mitingnı oyıştıruçılarnı millätara doşmanlıq qabızuda kisken ğäyepläp çığış yasadı.
