Sabantuylar çorı citte. Bu kürkäm yola ber respublika yäki ölkägä genä sıymıy. Uzğan şimbädä Sabantuyı iñ berençelärdän bulıp Pragada ütte. Bu yulı da ul Çexiä başqalası yanındağı Vyzlovka awılında, kül buyında uzdı. Anda Praga, Karlovy Vary şähärlärennän kilgän 80-läp keşe qatnaştı. Bu bäyrämne Pragada yäşäwçe millättäşlärebez Liliä Maxianova, Azatlıq radiosı xezmätkärläre, şulay uq Tatarstannıñ Çexiädäge säwdä wäkile Zöfär Abdulğäliev oyıştırdı. Pragada uzğan Sabantuynıñ batırı bulıp Xaris Sabircanov qaldı. Çexiädä tatar Sabantuyı berençe märtäbä bıltır uzğan ide.
