Ütkän şimbädä Udmurtiäneñ öç töbägendä milli bäyrämnär bulıp uzdı. Alar tatarlarnıñ yazğı çäçü eşläre tämamlanğaç uzdırıla torğan sabantuynı xäterlätä. Besermännär Yar rayonında Qorban bäyrämenä cıyıldı, çuaşlar — Aqatuy dip atalğan bäyrämnären Graxovo rayonında uzdırdı. Qaraqül töbägenä marıylarnıñ Semıq dip atalğan bäyrämenä respublikada yäşäwçe marıylar ğına tügel, xättä Tatarstannıñ Ägerce rayonınnan, Çallı şähärennän, Başqortstannan, Mari El respublikalarınnan da delegatsiälär kilgännär ide. Semıq bäyräme, respublikada ğömer itüçe olı yäştäge apa süzlärençä, elek bäyräm itelmägän.
Kraynı öyränüçe, respublikanıñ atqazanğan mädäniät xezmätkäre Robert Toqmurzin äytüençä, elek üzeşçän sänğät ostaları konsertları bik yış bulğan, xäzer alar yuq däräcäsendä. Bu xäl äkrenläp soñğı yıllarda marıy xalqınıñ üzeneñ telen, ğöref—ğädätlären yuğaltuğa kitergän, qatnaş ğailälär sanı artqan, şuña da mondıy bäyrämnärneñ bigräk tä yäşlär öçen ähämiäte zur dip bilgeläp ütte. Dörestän dä, bıyılğı bäyrämne oyıştıruçılar anı äzerläwdä yäşlärne cäläp itkän. Bäyräm Qama yılğası buyında matur alanda uzdı. Urman yanında quyılğan säxnädä konsert, mäydanda uyınnar oyıştırıldı. Konsert programması zur häm törle — marıy xalqınıñ «Tıpırton» iyüllärennän alıp, törle—törle yolaların çağıldırğan çığışlar küp buldı. Xalıqta programma zur qızıqsınu uyattı. Respublikanıñ milli säyäsät ministıyrlığı xezmätkäre Natal'ya Smirnova Udmurtiädä yäşäwçe başqa xalıqlarnıñ milli bäyrämnärennän ayırmalı bularaq, marıylar tapqan aqçaların büläkkä totmıy, ä awılların tözekländerü, klub qarşında tuplanıp eşläwçe ansambl'lärgä milli kiemnär, muzıka uyın qoralları alu öçen tota dip bilgeläp ütte. Milli kiemnär digäç, tatar sabantuyında milli kiemnärdän yörgän keşelär siräk oçrıy, oçrasa da alar nindider kollektiv äğzaları bulıp çığa, häm çığış yasağannan soñ milli kostyumnarın zamança külmäklärgä alıştırıp kienälär, xättä ir—yegetlärneñ başlarında tübätäy dä bulmıy. Ä marıylarnıñ bäyrämendä zamança tegelgän milli kiemnärdän küzlär qamaşa. Şul uq waqıtta äbilärennän qalğan külmäklär dä yış oçrıy. Däres, alar da ul külmäklärne bäyrämnärdä genä kiä. Ämmä kiä, häm kübese aña östenlek birä. Här delegatsiä kiemnärendäge üzençälek belän ayırılıp tordı. Tağın şunı da bilgeläp ütärgä kiräk, Başqortstan delegatsiäseneñ milli kiemnärendä — tatar-başqort xalqı yaratqan — yäşel töskä östenlek birelgän ide.
Marıylarnıñ Semıq bäyrämendä şulay uq tatarlarnıñ sabantuylarındağı küp kenä uyınnar, yarışlar da qabatlandı — su belän tulı çiläklär belän uzışu, qapçıq kiep yögerü, bağanağa ürmäläw, xättä köräştä dä tastımal qullanalar.
