Accessibility links

Кайнар хәбәр

Penzada Sabantuyı


27 iyündä Penza şähäreneñ Belinskiy isemendäge parkında Penza ölkäseneñ tuğızınçı Saban tuyı ütte. Moña qädär Penza ölkäseneñ törle tatar awıllarında da Saban tuyları buldı. Penza tatarlarınıñ soñğı Sabantuyı 4 iyüldä Urta Äläzän awılında bulır dip kötelä.

Penza şähärendä Saban tuyın uzdırırğa ikençe yıl inde rättän Tatarstannıñ Apas rayonı delegatsiäse yärdäm itä. Tatarstan delegatsiäse Penza Saban tuyına berençe qat 2002 yılda kilgän ide. Tatarstannan çittä yäşägän tatarlarğa Saban tuyları oyıştıruda yärdäm itü Tatarstannıñ däwlät politikasına äwerelde inde. Bu tatar xalqına bik faydalı eş.

Penza ölkäse gubernatorı Vasiliy Boçkarev parkta cıyılğan tatar xalqın Saban tuyı bäyräme belän qotladı. Saban tuyına kilgän tatarlar häm başqa xalıq wäkilläre köne buyı küñel açtı, aşadılar-eçtelär, törle konkurslarda qatnaştılar. Telägän keşelär üzlären tatar köräşendä sınadılar. Bilgele inde, köräş härwaqıt Saban tuyınıñ töp waqiğası bula. Uzğan yıl da, bıyıl da Penza ölkäse Saban tuyınıñ batırı isemen Ruslan Salyamov yaulap aldı. Ruslanğa 29 yäş, ul grek-rim köräşe belän şöğellänä, Penza ölkäseneñ Neverkin rayonı Karnavar awılınnan. Bu Karnavar awılına üz waqıtında çuaşlar nigez salğan dip isäplänä, çönki çuwaş telennän tärcemädä “Xarenvar” iseme “kipkän çoqır” digän töşençäne añlata. 1745 yılda bu awılda inde Alatır, Qasıym häm Temnikov öyäzlärennän kilgän 38 yomışlı tatar isäplängän.

Saban tuyı çınnan da tatar xalqınıñ urtaq bäyrämenä äwerelä bara. Qazan tiräsendä yäşäwçe tatarlar Saban tuyın elektän-elek, bälki meñ-meñ yarım yıldan artıq bäyräm itä kilsälär, Penza yaqlarında yäşäwçe tatarlar elek bu bäyrämne belmägännär häm soñğı yıllarda ğına üzlärenä traditsiä itep kertä başladılar. Tatar-mişär awıllarınıñ kübesendä älegä qädär ber Saban tuyı da ütkärelgäne yuq, ämma kiläçäktä här awılnıñ Saban tuyı bulaçaq dip ışanası kilä.

Azatlıq radiosı öçen Penzadan İrek Bikkinin.

XS
SM
MD
LG