Küptän tügel Yekaterinburg şähärendä Sverdlov ölkäse gubernatorı qarşında oyıştırılğan milli eşlär buyınça konsul'tativ sovetnıñ çirattağı utırışı bulıp uzdı. Kön tärtibendä barlıq milli oyışmalar öçen dä bik ähämiätle mäs'älä – milli massaküläm çaraların torğızu mä’säläse qaraldı. Sverdlov ölkäsendä moña qädär berniçä milli oyışma üz köçläre belän televizion tapşırular yasap qarağannar ide inde. Arada iñ ozaq yäşägäne – tatar telendäge televizion tapşırular. Alar 1999нчы yıldan başlap 2003нче yılğa qädär törle oyışmalar köçe belän atna sayın çığıp kildelär. 2002нче yılda ber yılğa yaqın başqort telendäge tapşırular da eşlände. Siräk kenä bulsa da ärmän tapşıruları kürengäläde.
Ä bügenge köndä milli televizion tapşırularnıñ barısı da eştän tuqtap tora. Säbäbe - matdi nigez citmäw. Milli oyışmalar citäkçeläre milli massaküläm mäğlümat çaraları buldıru mä’säläsen ölkä xakimiäte citäkçeläre aldında daimi räweştä kütärep kildelär. Bu problema gubernator qaramağında eşlägän konsul'tativ sovet utırışlarında yış tikşerelde. Häm, nihayät, ölkä xökümäte bu mä’säläne çişü yulın täqdim itte.
Ul täqdim buyınça milli oyışmalar qaramağına ölkä televideniese kanalında atnasına ber säğät buşlay waqıt bireläçäk. Anıñ yartısı rus telendä, törle millätlär tormışın yaqtırtqan millätara tapşıru bulaçaq. İkençe yartı säğät milli oyışmalarnıñ üzenä, törle tellärdä tapşıru yasaw öçen täqdim itelä. Äytik, ber atna tatar, ikençe atna başqort, öçençe atna ärmän telendä... Ämma şunısı bar, ul tapşırularnı yasaw çığımnarın milli oyışmalar üzläre kütärergä tieş. Ölkä xökümäte byudjetınnan bülep bireläçäk aqçanıñ yartısı millätara tapşıru yasarğa, yartısı televizion efir öçen tülärgä kitäçäk, dilär.
Utırışta bu xaqta bäxäslär küp buldı. Millätara tapşırularnı yasaw öçen östenlekne tatarlarnıñ ölkä milli-mädäni avtonomiäsenä birergä teläwläre dä qayberäwlärdä rizasızlıq tudırdı. Şunıñ öçen, utırışta qatnaşuçılar älegä ayırım ber qararğa kilä almadılar. Konsul'tativ sovet sekretare, bu turıda añlatma sorap möräcäğät itkäç, mä’säläneñ axırğaça çişelüe öçen beraz waqıt kiräk bulaçağın äytep, älegä añlatma birüdän baş tarttı.
