Yal könnärendä Belarus’ respublikası delegatsiäseneñ Tatarstanda räsmi säfäre tämamlandı. Respublikanıñ premyer-ministrı Sergey Sidorskiy häm başqa qunaqlar KamAZda buldılar, Alabuğadağı Belarus’ traktorların citeşterüçe şirkät belän tanıştılar. Antaliädä yal itüçe Tatarstan prezidentı Mintimer Şäymiev Törkiäneñ prezidentı Äxmät Näcär Sezer belän telefon aşa aralaştı. İke prezident Tatarstan belän Törkiä arasındağı xezmättäşlek, anı kiñäytü yulları turında söyläşkännär.
20 sentäber könne Qazanda tağın ber xalıqara fänni cıyılış eşen başlap cibärde. Bu yulı Tatarstanda organik häm fizik ximiä belän şöğellänüçe ğalimnär cıyılıp, täcribä urtaqlaşa. Älege fänni cıyılış 24 sentäbergä qädär däwam itäçäk.
Tatarstannıñ KamAZ şirkäte bıyıl berençe märtäbä Germaniäneñ Hannover şähärendä uzaçaq xalıqara avtosalonda qatnaşaçaq. Dönyada iñ zur häm populyar avtokürgäzmälärneñ berse bulğan şuşı yärminkädä tatarstanlılar üzläre citeşterä torğan iñ yaña modellärne täqdim itäçäk. Alar arasında Parij-Dakar yarışlarında berençelekne yawlağan KamAZ-4911 Extreme avtomobile dä bulaçaq.
Gölnaz İlgizär
