Eçke eşlär ministrlığında ütkän matbuğat oçraşuında, terrorğa qarşı köräş çaralarına finanslaw arttırılırğa tieş, dip belderelde. Eçke eşlär ministrlığı xezmätkärläre jurnalistlarnı cıyıp, Tatarstan tärtip saqlawçılarnıñ mömkin terrorçılarğa niçek qarşı toruları xaqında xisap tottı. Şuşı könnärdä, su saqlağıçları, kibetlär, mäktäplär, rayon idärälärendä şartlatqıçqa oxşatıp yasalğan mulyaj äyberlär qaldırıp kitkän häm saqçılar, xezmätkärlär üzlären niçek totarlar ikän, dip tikşergän. Näticälär qänäğätlänerlek tügel ikän. Şulay uq, respublika telekompaniälärenä höcüm yasalırğa mömkin, digän sıltaw belän öyränülär uzğan. Qazannıñ 2 televidenie kanallarına şartlatqıçqa oxşatıp yasalğan cihazlarnı quyıp qarağannar, häm ike telekompaniäseneñ dä mömkin terrorçılarğa qarşı tora almawı açıqlanğan. Bu oçraqlarda, tärtip saqlawçılar üzläre tikşerülär ütkärgän bulsa, alarnı tikşerüçelär dä bulğan. Mäsälän, mäğlümlät agentlıqları xäbär itkänçä, telefonnan tege, yäki bu binada bomba şartlarğa, terror ğämäle bulırğa mömkin, dip şayarıp şaltıratuçılar kübäygän. Şayartuçılardan tış, tuñğısız keşelär böten närsädän şiklänep, ber tuqtamıy militsiägä şaltırata başlağannar. Şulay, ber zaman, Qazan Däwlät Universitetında terror ğämäle äzerlänä, dip xäbär itüçelär bulğan. Şuşı xäbär arqasında, Oyışqan cinayätçelek belän köräş idäräse häm federal iminlek xezmäte wäkilläre dä, tön yoqlamıy, bu mäğlümatnı tikşerergä mäcbür bulğan. Bu xaqta matbuğat oçraşuında cinayätçelek belän köräş idäräse başlığı urınbasarı Aleksandr Popov söyläde. Näticädä, Qazan däwlät universitetında, räsmi terkälmiçä eşli torğan, 5 üzbäk tözüçesennän arı, ber nindi şikle faktlar açıqlanmağan. Aziä respublikalarınnan kilüçe tözüçe, remont yasawçılarğa xäzer ayırım iğtibar birelä. Terrorğa qarşı köräş yözennän, räsmi röxsätsez eşläwçe çit il watandaşların taläplär tağı da qırıslana. Ğadi Tatarstan keşeläre dä qayber xoquqlarnıñ qısıluın sizärgä mömkin, didelär eçke eçlär ministrlığı xezmätkärläre. Süz, hawa alanında, mäsälän äyberlärne centekläp qaraw, şik tudırsağız şäxesne qatı tikşerü, ekstremistlar ütep kerä torğan yullarnı küzätü turında bara. Eçke eşlär ministrı urınbasarı Artem Xoxorin, mädräsälärdä uquçılarnı, çit illärgä kitüçelärne häm monda kilüçelärne tikşerü turında söyläde.
Jurnalistlarğa birelgän käğäzlärdä äytelgänçä, wahhabiçılarğa qarşı toru yözennän, Älmät mädräsäseneñ uqıtuçısı ildän quyılğan bulğan, şuşı häm çallıdağı «Yöldız» mädräsäse uquçıları Çeçnä lagerlarında äzerlek ütkän, Kukmarada gaz torbasın da alar şartlatqan, dip äytelä.Bez Älmät mädräsäsenä şaltırattıq häm tübändägelärne beldek. Mädräsäne, äle bu atna başında ğına, qabat tikşergännär. Ber nindi ğäyep tapmağannar. Uquçılarnıñ, uqıtuçılarnıñ isemleläre eçke eşlär ministrlılığında bar. Uqu programmaları mäğärif ministrlığı belän kileştergän häm alar tarafınnan tikşerelgän. Bu xaqta Älmät mädräsäse uqıtuçısı Abdraxman Malikov söyläde.
Eçke eşlär ministrı urınbasarı Artem Xoxorin beldergänçä, terrorğa köräş yözennän möselmança kiengän keşelärne, qulğa alu bulmayaçaq. Ämma ul, härkemgä, üze belän şäxes tanıqlığın yörtü, qomaçaw itmäs, dide.Bikä Timerova.
