Bezneñ studiädä cäyge kanikulları waqıtında Amerikada eşläp qaytqan student yeget- Şamil Kärimov. Ul Orenburgnıñ yuğarı uqu yortında Finansı häm kredit fakul''tetınıñ 5 kurs studentı. Nişläp ul Qazanda yöri soñ dip uylarsız. Äye, Amerikadan tup- turı Şamil Qazanğa qayta. Çönki Ul Amerikada waqıtta anıñ ğailäse Qazanğa küçep qayta. Qayta şul tatarlar, qaytalar Qazanğa . Şulay bulsa da bügenge bezneñ söyläşü Amerika turında bulır, axrısı. Şamil, Amerikağa sin niçek barıp eläkteñ soñ? “ Xalıqara studentlar alışu programmasın işetkäç, bez qızıqsınıp , anda anketa tutırıp cibärdek. Bezgä çaqıru xatı kilde. Häm bez öç yeget anda bardıq. Pitsseriädä eşlädek, ämma bezneñ maqsat Amerikada yäşäwçelärneñ tormışı belän qızıqsınu buldı. Bez törle illärdän cıyılğan studentlar belän 3-4 teldä aralaştıq. Anda yäşägän tatarlarnı ezläp taptım. Alar 4-5 yıl elek barıp urnaşıp , xäzer törlese- törle eştä eşlilär, kemder finansist, kemder buxgalter bulıp. Bez bergä Sabantuy bäyräme uzdırdıq. İnternetta aralaşır öçen üzebezneñ saytnı açtıq.Qazan belän Amerikada yäşägän tatarlar arasında tığız bäyläneşlär buldırasım kilä”,- dide ul. Student xalqı ğömer –ğömerdän stipendiägä genä yäşämi, xäzer bigräk tä. Alar qaydadır eşkä urnaşalar, cäyge kanikullarda çit illärgä barıp qaytırğa tırışalar. Menä Şamil dä bıyıl xalıqara studentlarnı almaşu programması buyınça Amerikağa barıp, anda eş tabıp eşläp, törle ildän cıyılğan studentlar belän tanışıp 3-4 teldä aralaşıp qaytqan. Şamil Amerikağa barğaç , tatarlarnı ezlädem dide. Dimäk, yäşlärgä üz millät keşese belän aralaşuda , üz ğöref-ğädätlären saqlawda , törle tanış uyınnarnı tergezüdä, tarix belän qızıqsınuda ixtıyac zur. Bigräk tä maqsatlar urtaq bulğanda, aralaşu yäşlär öçen bik tä möhim ikän. Qazan tatarları belän Amerika tatarları arasında tığız bäyläneşlär buldıru öçen yanıp yörüçe yäşlärebez bu bäyläneşlärne zamança eşlämäkçe. Şunıñ öçen dä iğtibarığızğa tağın ber tapqır alarnıñ maxsus yasağan säxifäseneñ elektron adresın äytep kitäm. www.tatar-usa.nm.ru dip atala. Tatar yäşläreneñ Atlantik city şähärendä uzdırğan bäyrämnäre turında beläsegez kilsä, bu säxifägä kerep alarnıñ fotoların kürep tä, küp kenä mäğlümat alırğa mömkin.
Mälikä Basıyr, Qazan
