Accessibility links

Кайнар хәбәр

Hamid Qarzai Äfğanstanda prezident saylawlarında ciñüçe itep iğlan itelde


Hamid Qarzai bügen Äfğanstan prezidentı saylawlarında ciñüçe dip iğlan itelde. Tikşerüçelär, tawış birü waqıtında bulğan xärämläşülär – saylaw näticäsenä tä'sir itärlek bulmadı, dip belderde. Qabulda uzğan räsmi tantanada Berläşkän Millätlär Oyışması häm Äfğanstan wäkillärennän torğan saylaw komissiäse başlığı Zakim Şah, Qarzainıñ ciñüe turında iğlan itte. Anıñ öçen saylawçılarnıñ 55%tı tawış birgän. Tikşerü xäyätendäge Kanada wäkile Craig Jennes, qayber tärtip bozularnı sanamağanda 9nçe üktäber saylawları ğömüm alğanda – uñışlı buldı, dip belderde: "2004nçe yılğı Äfğanstan prezidentı saylawları çağıştırmaça tınıç häm imin şartlarda uzdı. Saylawlarda xalıqnıñ zur öleşe qatnaşırğa teläk belderde. Tawış birügä xatın-qızlar da kilde," dide tikşerü komissiäse wäkile. Hamid Qarzai bu uñaydan irtägä Qabulda çığış yasar dip kötelä. Bügen Londonda premyer-ministr Tony Blair Qarzainı qotlap, Äfğanstanda Taliban bärep töşerelgäç bulğan yaxşı üzgäreşlärne bilgeläde. NATO general sekretare Jaap de Hoop Scheffer, Tönyaq Alyans Qarzaiğa ilne totrıqlandıru eşendä yardäm itergä äzer tordı, dip belderde.
XS
SM
MD
LG