Accessibility links

Кайнар хәбәр

Cır bäygesendä kem qatnaşa


Mäğlüm bulğança, 16nçı fevral'dän 20senä qädär Qazanda İlham Şakirov isemendäge 11nçe xalıqara tatar cırı konkursı bara. Älege konkursta qatnaşırğa Omskidan 10nan artıq keşe telägen beldergän ide. Berençe turda alarnıñ 7se qatnaşa aldı - yäğni bäygeneñ şartları buyınça 3är cır äzerläp jyuri xökemenä yazmalar cibärde. Aralarında törle - tatar häm rus cırları konkurslarında ciñüçelär, mädäniät kölliäte, muzıka uçilişçesı talibläre, xätta teatr artistı da buldı. Aña qaramastan ikençe turğa ber genä cırçı – “Eşmäkärlek häm xoquq” kölliäte talibe, 17 yäşlek Röstäm Äxmätcanov qına çaqırıldı. Röstäm tatar cırların “Umırzaya” ansamble qarşında eşläwçe “Ömet” studiäsenä yörep öyrände. Studiä urnaşqan mädäniät sarayı anıñ yäşägän urınınnan yıraq, atnağa ike märtäbä şähärneñ ber çitennän ikençe çitenä yörergä turı kilsä dä, 8 yıl buyına repetitsiälärgä daimi yörüçe ul, - di kollektiv citäkçese Ğafiä Aleyeva. Çaqıru käğäzen aluğa yeget aldında berniçä problema kilep bastı. Berençedän matdi yaq-yulğa çığu öçen kesä yağın qayğırtu, ikençedän aldağı ike turda başqarılası cırlarğa fonogrammalar äzerläw, anısı da şul uq aqça mäs`äläsenä bäyle. Döres, milli oyışmalar, häwäskär kollektivlar xacäten qayğırtu öçen buldırılğan Duslıq Yortınıñ 2005 yılğı maqsatlı programmasında ber keşene Qazanğa tatar cırı bäygesenä cibärü qaralğan ide. Ämma, waqıtı citkäç monıñ mömkin tügellege açıqlandı. Omski ölkäse mädäniät ministrlığınıñ milli eşlär bülege baş belgeçe Natal'ya Rıybakova süzlärençä, byudjettan kiräkle summanı bülep birü öçen Tatarstan mädäniät ministrlığınnan räsmi, yäğni konkursqa fälän keşene cibärüläre soralğan käğäz kiräk ikän. Andıyraq käğäz - konkursqa çaqıru, 11nçe turğa qatnaşaçaq keşegä – Röstämneñ üz isemenä genä kilgän bulıp çıqtı. Şulay da fonogramma äzerläp birergä wäğdä qıldılar, ä yulğa häm başqa çığımnarğa ximayäçe ezlärgä kiñäş ittelär. Näticädä ni säbäptänder fonogramma wäğdä bulıp qına qaldı. Ä yulğa aqça Röstämneñ muzıykal' citäkçese, uqıtuçısı Ğafiä Aleyeva tırışlığı belän tabıldı – berniçä eşmäkär - tatar yegetläre yärdäm itte. İnde Omski yegeten Qazanda nindi uñış yäisä uñışsızlıq kötä - ansın waqıt kürsäter.

Rozaliä Sayganova, Azatlıq radiosı, Omski.

XS
SM
MD
LG