Accessibility links

Кайнар хәбәр

Demokratiä – çaqırılmağan qunaq


1 martta Başqortstan Yuğarı mäxqämäse “Cirle üzidärä öçen” respublika fondınıñ başqarma direktorı, “Za mestnoye samoupravlenie” gäziteneñ möxärrire Robert Zağreyevnıñ BR Üzäk saylaw qomissiäseneñ 4 fevräldäge 27 martta referendum ütkärü turındağı qararın qanunsız dip tanunı sorağan ğärizäsın känägätländermäw turında qarar çığardı. Mäğlüm buluınça, 2006 yılnıñ 1 ğinwarennän başlap “Cirle üzidäräne oyıştırunıñ ğomum prinsipları turında” digän federäl qanun köçenä kerä. Bu çor eçendä RF töbäkläre munitsipäl berämleklär başlıqların saylaw räweşen, cirle deputatlarnıñ sanın bilgelärgä tieş. Şulay uq, ağımdağı yılnıñ 1 noyabrenä xätle munitsipäl berämleklärneñ wäkillekle häm başqarma orğannarına saylawlar ütkärelergä tieş. İskä alğan federäl qanunğa yaraşlı räweştä, munitsipäl berämleklär başlıqları ike törle yul belän saylana ala. Berençe yul – urındağı xalıq saylıy. İkençe yul – cirle deputatlar qorpusı üz aralarınnan ber deputatnı saylap quya. Añlaşıla ki, respublika türäläre xalıq saylawın tügel,ä üzläre tözegän isemlek aşa saylanğan urındağı deputatlar qulı belän üzläre törtep kürsätkän keşene saylatunı xup kürälär. Başqortstannıñ tatar milli oyışmaları häm citäkçelegendä Robert Zağreyev ta bulğan “Cirle üzidärä öçen” fondı munitsipäl berämleklär başlıqların xalıq saylawına ireşü öçen referendum ütkärergä imzalar cıyıp BR Üzäk saylaw qomissiäsenä tapşırdı. Ämma, Üzäk saylaw qomissiäse imzalar cıyu döres oyıştırılmağan dip, ul referendumnı ütkärü turında qarar çığarudan baş tarttı. Ä respublik citäkçelege, üz çiratında, berkemgä mäğlüm bulmağan initsiativ törkemnär qulı belän üz referendumnarı öçen imza cıyğan bulıp çıqtı häm 4 fevräldä BR Üzäk saylaw qomissiäse ul referendumnı 27 martta ütkärü turında qarar da çığarğan. Türälär referendumı sorawı bolay yañğırıy (bernindi tögälsezlektä dä ğäiplämäsennär öçen ul soraw originälında birelä: “Согласны ли Вы с тем, чтобы в соответствии с требованиями Федерального закона «Об общих принципах организации местного самоуправления в Российской Федерации», инициированного Президентом Российской Федерации В.В.Путиным, была установлена следующая структура органов местного самоуправления муниципального образования город Уфа: представительный орган муниципального образования (Совет), председателем которого является избираемый из его состава глава муниципального образования (Председатель Совета); местная администрация муниципального образования (Администрация) во главе с главой местной администрации (Глава Администрации)" 3 martta Robert Zağreyev fizik şäxes sıyfatında BR Üzäk saylaw qomissiäseneñ bu qararın köçennän çığarunı sorap BR yuğarı mäxqämäsenä möräcägät itte. Zağreyev üzeneñ ğärizäsında referendumğa çığarılğan sorawğa “äye” yäisä “yuq” dip kenä cawap birep bulmağanlığın, Üzäk saylaw qomissiäseneñ referendum ütkärü turındağı qararınıñ räsmi basmalarda xalıqqa citkerelmäwen, munitsipäl berämlek başlığın saylaw protsedurası añlaşılmawın, RF Prezidentı V.Putinnıñ iseme anıñ rizalığınnan başqa sorawğa kertelüen sanap kitä. Mondıy şartlarda bu referendumnı ütkärü minem xoquqlarımnı sanğa suqmaw, alarnı bozu bulıp tora dip belderä. Bu ğärizänı mäxqämägä tapşırğannan soñ, 5 martta “bilgesez keşelär” Zağreyevnı yortı yanında totıp alıp añardan ğärizäsın kire alunı taläp itälär. Zağreyev taläpne kire qaqqaç, nıq itep tuqmıylar häm kiläçäktä dä çara küreläçägen äytep yanap kitälär. 9 – 10 martta BR Yuğarı mäxqämäse Zağreyevnıñ ğärizäsı buyınça eşne qaradı häm 11 martta anı qänägätländermäw turında qararın iğlan itte. Älbättä, RF Prezidentı üze töbäk başlıqların bilgeläp quyu yulına basqan waqıtta BR femidäsınıñ mondıy qarar çığaruı bik säyer toyılmıy. Ni disäñ dä demoqratiä Rusiädä xuca da, xätta, qunaq ta tügel, ä barı tik çaqırılmağan qunaq qına.

Kärim Yauşev, Ufa
XS
SM
MD
LG