Mäskäwdä qarşılıq aksiäse ütäçäkme?

Xäbär itüebezçä, 7nçe april Başqortstannıñ berläşkän oppozisiäse Mäskäwdä qarşılıq aksiäse ütkärergä cıyına. Oppozisiä 7nçe aprilgä «Boing» oçqıçına 1.034.000 sumlıq bilet alğan. Läkin respublika xakimiäte moña yul quymawı da ixtimal. Bu turıda «Revinform» mäğlümat ağentlığı xäbär itte. Aña qarağanda, respublika xakimiäte «VİM Avia» kompaniäsenä basım yasap, oçunı özüne sorağan. Qarşı oçraqta, oçqıçnı aeroporttan çığarmaw häm kompaniäneñ Başqortstandağı eşçänlegen tuqtatu belän yanağan. «Revinform» «Ufa» aeroportınıñ xalıqara aeroport buluın häm federal milek ikänlegen iskä töşerep, şulay bula qalsa, bu respublika xakimiäteneñ federal wäkälätlärgä qısıluı bulaçaq dip bäyäli. Berläşterelgän oppozisiä eşçänlegen kileşterü şurası räise urınbasarı Mäcit Xucin oçunıñ özelü ixtimallığı turında federal inspektorğa xäbär itülären häm hawa kompaniäse citäkçelegenä säyäsi säbäplärdän oçışnı özergä yul quymasqa çaqıruların ireşterde. Mäskäwdä uzaçaq çarağa 30ğa yaqın cämägätçelek oyışması häm firqa bülekçälärennän 150dän artıq keşe baraçaq. Alar Lubyanka mäydanında piket ütkäräçäk, Rusiä Prezidentı xakimiätenä Başqortstan Prezidentın alunı sorap cıyğan imzalar tapşırılaçaq. Aña barlığı 117 000 keşe qul quyğan. Şulay uq Rusiä däwlät Duması deputatları belän oçraşu planlaştırılğan. Bu oçraşunı, ayıruça, kommunistlar, liberal demokratlar häm «Rodina» firqäse bloqkları xuplağan. Qarşılıq aksiäsendä qatnaşuçılar şul uq könne Ufağa qaytaçaq. Başqortstannıñ räsmi mäğlümat çaraları bu aksiäne pıçratu kampaniäsen cäyelderde. Alarda monıñ zakazlı buluı äytelgän, çara «babuinnarnıñ Mäskäwdäge biyüe» dip bäyälänä. Ber cenesle ğäilälär tözüne qanunlaştıru öçen köräş däwam itä. Bu köräşne Başqortstan parlamentı deputatı Edward Murzin citäkli.Ul Mäskäw ZAGSına «Kwir» jurnalı möxärrire Mişin belän urtaq ğailä tözüne räsmi berketü turında ğarizä birgän ide. ZAGS anı qabul itüdän baş tartqaç, ul mäxkämäläşä başladı. Ostankino mäxkämäsendä uñay qararğa ireşmägäç, ul Mäskäw mäxkämäsenä birde. Anısı älege eşne 14nçe april qarayaçaq. Murzin barlıq mäxkämälärne uzıp, Konstitutsiä mäxkämäsenä barıp citärgä ömet itä. Edward seksual azçılıqlar mänfäğäten yaqlaw öçen cämägätçelek oyışması töziäçägen ireşterde. Ul «Azçılıq xoquqları» dip atalaçaq.

Mönir Wafin, Ufa